„Við erum að biðja ykkur um að takast á við eitt andlát, síðan annað og síðan annað.“ Þetta er það sem sagt er við liðsmenn í sérstöku teymi í Lundúnum  sem hefur það eina hlutverk að fara inn á heimili og sækja lík fólks sem hefur látist af völdum COVID-19. Liðsmenn teymisins hafa verið varaðir við því að „vanmeta ekki hversu ógeðfellt verkefnið verður“.

Sky skýrir frá þessu. Fram kemur að í teyminu, sem er síðan skipt niður í átta minni teymi, séu lögreglumenn, slökkviliðsmenn og heilbrigðisstarfsmenn. Teymið á að létta álagi af sjúkrahúsum og sjúkrabílaþjónustu borgarinnar á meðan COVID-19 faraldurinn geisar.

Teymin munu fara inn á heimili, dvalarheimili og líknardeildir til að staðfesta andlát og ganga úr skugga um hverjir hinir látnu eru. Einnig munu þau veita aðstandendum stuðning áður en líkin verða flutt í líkhús. Teymin hófu störf í síðustu viku en búist er við að um þriðjungur fórnarlamba COVID-19 faraldursins muni látast utan sjúkrahúsa.

Wayne Matthews, yfirlögregluþjónn hjá Lundúnalögreglunni, sagði meðlimum teymanna að „vanmeta ekki hversu ógeðfellt verkefnið verður“.

„Þetta er verkefni sem tekur mikið á tilfinningar. Við erum að biðja ykkur um að takast á við eitt andlát, síðan annað og síðan annað. Það er svo augljóst að það þarf að búa yfir miklum andlegum og líkamlegum styrk til að geta gert þetta og af þeim sökum báðum við um sjálfboðaliða, fólk sem telur sig reiðubúið til að gera þetta.“

Eftir hvert verkefni geta teymin fengið smá hlé til að takast á við það andlega álag sem verkefnin valda þeim.