Eftir að COVID-19 faraldurinn braust út jókst eftirspurnin eftir handspritti gríðarlega og erfitt hefur verið að anna eftirspurn á köflum. Þetta hefur orðið til þess að verðið hefur víða rokið upp.

Í Helsingør í Danmörku var staðan þannig nýlega að bæjarfélagið varð að greiða 325 danskar krónur fyrir hverja flösku af handspritti. Frederiksborg Amts Avis skýrir frá þessu. Miðað við verðið þá má segja að handsprittið hafi verið orðið að „fljótandi gulli“.

En nýlega voru bæjarstarfsmenn sendir til að taka til í gamalli hlöðu í bænum. Þar gerðu þeir uppgötvun sem varð til þess að verðið á handspritti snarlækkaði eða niður í 17 danskar krónur fyrir hverja flösku.

Í hlöðunni voru 40 brúsar sem innihéldu samtals 1.000 lítra af hreinu áfengi.

Starfsfólk bæjarins hafði samband við Nordcoll verksmiðjuna, sem er í bænum, en þar venjulega framleitt lím og önnur álíka efni. Eftir viðræður við forsvarsmenn verksmiðjunnar var framleiðslu hennar breytt og byrjað að breyta þessu hreina áfengi í handspritt. Starfsfólkið fékk aðstoð frá vinum og ættingjum til að hlutirnir gætu gengið hratt fyrir sig og á aðeins fimm dögum voru framleiddir 1.000 lítrar af handspritti. Bæjarfélagið kaupir handsprittið síðan og greiðir aðeins 17 krónur fyrir hverja flösku.