Philip hafði um langa hríð haldið framhjá eiginkonu sinni með konu úr söfnuði hans en sú var einnig vinkona Önnu. Í kjölfar þess að orðrómur um framhjáhald Philip komst á kreik lét hann af prestembættinu.
Lögregluna grunaði strax að ekki væri allt með felldu varðandi dauða Önnu og grunurinn beindist að eiginmanni hennar. Þegar lögreglumenn skoðuðu hvað Philip hafði verið að gera á internetinu kom í ljós að hann hafði leitað sér upplýsinga um krufningar, eitranir og „hvort 100 mg af Ativan væru banvæn“. Toronto Sun skýrir frá þessu. Við krufningu á Önnu fannst Lorazepam í blóði hennar en það er róandi lyf sem hún hafði ekki fengið ávísað.
Philip var handtekinn en neitaði sök. Lögmenn hans héldu því fram að dauði Önnu hefði verið „hörmulegur atburður“ en gátu ekki skýrt hann nánar.
Það styrkti einnig grunsemdirnar í garð Philip að leitarsaga hana á internetinu og netnotkun hans var ansi óvenjuleg.
Anna hafði sett klámsíu á tölvu þeirra hjóna til að koma í veg fyrir að Philip væri að heimsækja klámsíður. Þessi sía var aftengd 40 mínútum áður en Philip hringdi í neyðarlínuna og tilkynnti um lát Önnu. Það var Philip sem aftengdi síuna en hann fékk nýtt lykilorð að henni sent í tölvupósti, í netfang Önnu.
Í síðustu viku var mál hans tekið fyrir dóm á nýjan leik en hann var dæmdur í 15 ára fangelsi árið 2014 fyrir að hafa orðið Önnu að bana. Hæstiréttur ógilti þann dóm þar sem dómari gerði mistök við málsmeðferðina og því þurfti að rétta á nýjan leik. Refsing Philip verður ákveðin í apríl en þangað til gengur hann laus.
