Í fyrsta sinn í sögunni hafa vísindamenn rannsakað botninn í hinni risastóru og djúpu holu „Great Blue Hole“ sem er utan við strendur Belís. Þessi hola hefur verið heimsþekkt og vinsæll áfangastaður kafara síðan sjávarlíffræðingurinn Jacques Cousteau kynnti heiminum hana.

Holan er um 70 kílómetra frá ströndum Belís í miðju Lighthouse kóralrifinu. Holan hefur verið á heimsminjaskrá UNESCO síðan 1996. En þrátt fyrir vinsældir hennar hefur lítið sem ekkert verið vitað um hvað væri á botni hennar, þar til nú.

Nýlega var gerður út leiðangur til að kortleggja hið magnaða vistkerfi sem er í þessari 124 metra djúpu holu. Í þrjár viku í nóvember og desember var kafað daglega niður til að taka myndir og gera þrívíddarlíkan af holunni með aðstoð sónartækis.

Bryan Price, aðstoðarforstjóri Aquatica Submarines, segir að nú verði hægt að sýna hvernig holan lítur út að innan. Fyrirtæki hans útvegaði búnaðinn sem var notaður í leiðangrinum. TV2 hefur eftir honum að á botninum hafi fundist spor sem ekki hefur enn tekist að greina.

Sjálfur lýsti hann þessu sem „ferð til tunglsins þar sem maður finnur fótspor sem ekki ættu að vera þar“.

„Við hugleiddum hvort þetta væri eftir dýr sem hefði dregist áfram eftir botninum eða hvort eitthvað hefði sokkið til botns og rúlla á honum en það passaði ekki. Það var ekkert sem gat útskýrt þetta.“

Sagði hann.