Donald Trump, Bandaríkjaforseti, ávarpaði bandarísku þjóðina í gærkvöldi, í nótt að íslenskum tíma. Hann sagði neyðarástand ríkja við landamærin að Mexíkó, ástand sem aðeins væri hægt að leysa með því að reisa múrinn sem hann hefur lofað að láta reisa á landamærunum.

Hann sagði að ástandið ógni þjóðaröryggi og sé einnig neyðarástand hvað varði mannúðarmál. Mörg þúsund ólöglegir innflytjendur komi yfir landamærin og Bandaríkin geti ekki tekið við þeim öllum. Hann eyddi níu mínútum í að draga upp dökka mynd af ástandinu á landamærunum og lýsti óánægju sinni með að geta ekki gert neitt við „þær þúsundir glæpamanna“ sem komast árlega til Bandaríkjanna sem og að geta ekkert gert gegn fíkniefnasmygli yfir landamærin.

„Þetta er hinn skelfilegi raunveruleiki sem við búum við. Þetta er neyðarástand fyrir hjartað, neyðarástand fyrir sálina. Þetta verður að stöðva.“

Sagði hann.

Hann gagnrýndi demókrata, sem eru nú í meirihluta í fulltrúadeild þingsins, fyrir að „standa í vegi fyrir nauðsynlegri fjármögnun múrsins“.

Þetta er í fyrsta sinn sem Trump hefur haldið sjónvarpsávarp sem allar stóru sjónvarpsstöðvarnar sýndu. Venjan er að slík ávörp séu aðeins flutt þegar neyðarástand ríkir. Fyrir ávarpið veltu margir fyrir sér hvort Trump myndi lýsa yfir neyðarástandi við landamærin og þess vegna ákváðu sjónvarpsstöðvarnar að sýna ávarpið í beinni útsendingu.

Politico segir að heimildarmenn í Hvíta húsinu segi að Trump hafi á síðustu stundu hætt við að lýsa yfir neyðarástandi þar sem miklar líkur séu á að farið yrði með málið fyrir dóm.