Duglegir og hugvitssamir afbrotamenn tóku sig til fyrir nokkru og byrjuðu að grafa göng sem áttu að liggja inn í banka í Pembroke Pines verslunarmiðstöðinni í Flórída. Vandað var til verka og fóru gangnagerðarmenn leynilega með verkefnið enda mikið til vinnandi að ekki kæmist upp um þá. En óvæntur atburður við inngang verslunarmiðstöðvarinnar kom upp um verkefnið.

Á miðvikudaginn var lögreglunni tilkynnt um að hola væri að myndast við inngang verslunarmiðstöðvarinnar. Holur eins og þessar, sem eru nefndar sinkhole á ensku, komast öðru hvoru í fréttirnar enda geta þær orðið ansi stórar og gleypt ýmislegt. Lögreglan brást því skjótt við enda ekki að vita hversu stór þessi hola yrði og hvort hún myndi gleypa bíla og annað á bifreiðastæðinu við verslunarmiðstöðina.

Þegar lögreglumenn komu á staðinn sáu þeir að hola hafði myndast í malbikinu. Við nánari skoðun sást að hún teygði sig að „holu í holunni“ en það reyndust vera göng sem var nýbúið að grafa. Að sjálfsögðu skoðuðu lögreglumennirnir göngin betur og sáu að þau voru 60 til 120 sm í þvermál og að minnsta kosti 5 metra löng. Inngangur þeirra var í skóglendi skammt frá verslunarmiðstöðinni og lágu þau beint að útibúi Chase bankans í verslunarmiðstöðinni.

„Ég myndi vilja segja að ég hafi séð eitthvað þessu líkt í kvikmyndum en þessi göng eru svo þröng, þetta er alveg einstakt.“

Sagði Michael Leverock, talsmaður alríkislögreglunnar FBI, um málið.

Inngangur gangnanna var falinn bak við timburplötu. Inni í göngunum fundust skítug stígvél, lítill heimagerður stigi, kollur, tæki til að grafa með og lítil rafstöð.

„Þetta fólk notaði axir og lítinn vagn.“

Sagði Leverock.

Lögreglan sendi fjarstýrðan bíl inn í göngin til að kanna þau betur og komst að því að þau lágu alveg upp að bílalúgu bankans. Bankinn er enn opinn en bílalúgan er ekki opin þessa dagana í kjölfar þessarar uppgötvunar.

Lögreglan veit ekki hver eða hverjir voru að verki eða hversu lengi verkið hefur staðið yfir.