Þann 1. október 2017 skaut Stephen Paddock 58 manns til bana og særði um 900 á kántríhátíð í Las Vegas í Bandaríkjunum. Lögreglan náði ekki að handsama hann því hann framdi sjálfsvíg áður en lögreglumenn ruddust inn á hótelherbergið þar sem hann hafði komið sér fyrir og skaut á hátíðargesti. Lítið hefur verið vitað um ástæður ódæðisverksins en nú segist lögreglan hafa komist að hvað lá að baki hjá Paddock.

Hann skildi ekki eftir neina yfirlýsingu eða álíka eins og fjöldamorðingjar og hryðjuverkamenn gera stundum. Af þeim sökum var rannsókn lögreglunnar erfið og óljós hvað rak Paddock til þessa níðingsverks.

„Hann gerði þetta til að drepa eins marga og hann gat til að fá athygli og skilja einhverskonar eftirmæli eftir sig.“

Segir Aaron Rouse sem hefur stýrt rannsókn alríkislögreglunnar FBI á málinu þegar FBI kynnti umfangsmikla skýrslu sína um málið. Í skýrslunni kemur fram að MGM Mandalay Bay hótelið, þaðan sem Paddock skaut á fólkið, lét hann fá lúxussvítuna án endurgjalds en hann var vinsæll í spilavítum borgarinnar enda hafði hann spilað fyrir eina og hálfa milljón dollara í borginni frá 2015. Starfsfólk hótelsins aðstoðaði hann svo óafvitandi við að bera skotvopnin upp í svítuna sem var á þrítugustu og annarri hæð.

Í 11 mínútur lét Paddock skotin dynja á mannfjöldanum en um 22.000 manns voru samankomnir á hátíðinni.

Sérfræðingar FBI í fjöldamorðum hafa kafað ofan í málið til að greina það og reyna að átta sig á hugsunargangi Paddock. En FBI segist ekki hafa fundið neina eiginlega ástæðu fyrir voðaverkinu aðra en að Paddock hafi viljað skapa sér eftirmæli eins og fyrr greinir.

„Morðin voru ekki af trúarlegum eða pólitískum toga. En það er greinilegt að Paddock undirbjó sig vel.“

Sagði talsmaður FBI.