Á fréttamannafundinum sagði lögmaðurinn, Svein Holden, að þeir sem rændu Anne-Elisabeth, eða segjast að minnsta kosti hafa gert það, hafi sett sig í samband við fjölskylduna í síðustu viku.
Holden sagði að í samráði við lögregluna hafi verið ákveðið að skýra frá gangi mála. Hann sagði að sú samskiptaleið sem meintir mannræningjar hafi notað bjóði upp á takmarkaða möguleika til samskipta en hún hefur áður verið notuð í samskiptum við þá. Hann vildi ekki segja á hvaða tungumáli samskiptin fóru fram. Ekki hafi komið fram neinar sannanir fyrir að Anne-Elisabeth sé á lífi eða að sá sem setti sig í samband við fjölskylduna hafi hana í haldi. Hann sagði að fjölskyldan telji þó að hér séu þeir komnir sem hafi rænt Anne-Elisabeth.
„Við tökum þetta sem skýrt merki um að Anne-Elisbeth Hagen sé á lífi og að hún geti snúið aftur til fjölskyldu sinnar.“
Sagði hann. Hann sagði að fjölskylda hennar væri reiðubúin til samningaviðræðna til að fá Anne-Elisabeth aftur heim en fyrst þurfi að liggja fyrir sönnun um að hún sé á lífi.
Ekkert hefur heyrst til Anne-Elisabeth síðan hún var numin á brott. Það eina sem lá ljóst fyrir frá upphafi var að lausnargjalds væri krafist fyrir hana en það kom fram á nokkrum miðum sem fundust á heimili þeirra hjóna, þeir voru skrifaðir á bjagaðri norsku. Einnig kom fram á þeim að Anne-Elisabeth yrði unnið tjón ef lögreglunni yrði blandað í málið. Tom Hagen gerði það nú samt sem áður samdægurs. Lögreglan fór mjög leynt með rannsóknina og skýrði ekki opinberlega frá málinu fyrr en þann 9. janúar þegar hún komst ekki lengra áleiðis við rannsóknina.
