Lögreglan í Los Angeles telur sig hafa haft hendur í hári manns sem hefur undanfarin tvö ár skotið á fólk í Malibu Creek þjóðgarðinum sem er vinsæll enda mikil náttúrufegurð þar og garðurinn vinsæll fyrir upptökur kvikmynda og sjónvarpsþátta.

Það var eiginlega tilviljun að maðurinn náðist því lögreglan var að eltast við grunaðan innbrotsþjóf og handtók hann í óbyggðum nærri Los Angeles í október. Fljótlega fór lögregluna að gruna að hinn handtekni væri maður sem hafði skotið á fjölda manns og myrt einn í þjóðgarðinum á undanförnum tveimur árum.

Skotárásirnar hófust í nóvember 2016 þegar maður var skotinn og særður þar sem hann svaf í hengirúmi. Viku síðar var skotið inn í svefnrými bíls. Í júní á þessu ári var Tristan Beaudette, 35 ára, skotinn til bana í þjóðgarðinum en hann var sofandi í tjaldi ásamt tveimur dætrum sínum, tveggja og fjögurra ára.

Í tilkynningu frá saksóknara í Los Angeles var það Anthony Rauda, 42 ára, sem var handtekinn í óbyggðunum. Hann hefur nú verið ákærður fyrir morðið á Beaudette og tíu morðtilraunir auk fjölda innbrota.

Rauda á lífstíðarfangelsi yfir höfði sér ef hann verður fundinn sekur um ákæruatriðin.