Fertug bresk kona, Nicole Elkabbas, hefur verið ákærð fyrir vægast sagt ósmekklegt framferði. Hún þóttist vera með krabbamein og fékk góðhjartað fólk til að „fjármagna krabbameinsmeðferð“. Alls hafði hún 45.000 pund, sem svarar til um sjö milljóna íslenskra króna, upp úr krafsinu.

The Sun skýrir frá þessu. Fram kemur að Nicole, sem hefur komið fram sem grínisti í sjónvarpi, hafi verið ákærð í byrjun mánaðar fyrir að hafa svikið 45.350 pund út úr góðhjörtuðu fólki sem vildi styðja hana í baráttunni við krabbamein. Peningunum safnaði hún á netinu. Þetta gerði hún frá því í febrúar og fram í ágúst á síðasta ári.

Nicole var látin laus gegn tryggingu en á að mæta fyrir rétt í byrjun maí.