Heimildamyndin Leaving Neverland hefur vakið upp heitar umræður og miklar tilfinningar að undanförnu. Í henni er fjallað um meint kynferðisofbeldi Michael Jackson gegn ungum drengjum. Nú hyggst bróðursonur Jackson, Taj Jackson, gera nýja heimildamynd um frænda sinn og á hún að segja aðra sögu en Leaving Neverland.

„Þetta verður ekki bara hrós og áróður. Þetta verður ekki: „Sýnum Michael Jackson sem mannvin“. Þetta snýst um að varpa hulunni af öllu því sem hefur verið rætt um á undanförnum 20 til 30 árum.“

Hefur NME eftir Taj Jackson. Hann er sonur Tito Jackson, bróður poppstjörnunnar. Hann eins og aðrir í fjölskyldunnu fylgdust bara með af hliðarlínunni þegar Leaving Neverland var gerð. NME hefur eftir honum að enginn úr fjölskyldu Jackson hafi verið spurður hvort þeir vildu koma að gerð myndarinnar. Af þessum sökum segist hann finna sig knúinn til að búa til sína eigin heimildamynd.

„Myndin hefst með ásökununum 1993 því ég tel að þá hafi þetta allt byrjað. Þar ætla ég því að byrja. Hún á að snúast um samkomulagið sem var gert í einkaréttarmálinu og af hverju hann gerði það. Á einum tímapunkti var hann mjög mótfallinn því að gera sátt og var fúll en lét síðan undan. Af hverju gerði hann það? Þetta á myndin að fjalla um.“

Sagði Taj Jackson og vísar þarna til fyrstu ásakananna á hendur Michael Jackson en 1993 sakaði faðir Jordy Chandler, 13 ára, hann um að hafa brotið kynferðislega gegn piltinum.

Taj Jackons segir að frændi hans hafi samið um greiðslu til foreldra Jody Chandler í einkamáli þeirra gegn honum svo hann gæti einbeitt sér að réttarhöldum í sakamálinu gegn honum. Hann segir að eftir að faðir Chandler hafði fengið þær 20 milljónir dollara sem Michael Jackson féllst á að greiða honum hafi hann ekki viljað fara með málið fyrir dóm sem sakamál. Taj Jackson vonast til að geta haft uppi á Jordy Chandler til að ræða við hann í myndinni en enginn hefur komist í samband við hann síðan 2016.

Það kom fram í málarekstrinum gegn poppgoðinu að Jordy hafði teiknað mynd af getnaðarlimi hans sem passaði við ljósmyndir sem lögreglan tók af getnaðarlimnum við rannsókn málsins. Meðal annars er sagt að Jordy hafi teiknað ákveðna bletti sem voru á limnum en sáust aðeins ef honum var lyft. Taj Jackson segir að teikning Jordy hafi ekki verið rétt því hann hafi teiknað mynd af umskornum lim en poppgoðið hafi ekki verið umskorinn.

„Ætlar einhver að segja mér að strákur, sem á margoft að hafa stundað kynlíf með Michael Jackson, hafi ekki vitað hvernig getnaðarlimur hans leit út? Að hann hafi ekki vitað hvernig limur, sem ekki er umskorinn, lítur út?“

Segir Taj Jackson.