Sergej Skripal er fyrrum liðsmaður rússnesku leyniþjónustunnar og þyrnir í augum rússneskra ráðamanna því hann sveik lit og gekk Bretum á höndum fyrir nokkrum árum.
Morðtilræðið vakti mikla athygli um allan heim sem og uppljóstranir í kjölfar þess. Það voru því ekki aðeins vestrænir fjölmiðlar sem fjölluðu um það heldur einnig fjölmiðlar í flestum heimsálfum. Tveir enskumælandi fjölmiðlar, sem er stýrt af rússneskum yfirvöldum, fjölluðu einnig um málið. Þetta eru RT (Russia Today) og Sputnik. Báðir þessir miðlar birtu fréttir, staðreyndir, staðleysur og lygasögur um málið.
Í heildina sendu Rússar frá sér 138 sögur eða kenningar um málið, oft misvísandi og rangar, eftir því sem kemur fram í niðurstöðum nýrrar rannsóknar vísindamanan við King‘s College í Lundúnum. Rannsókn þeirra byggir á umfjöllun fjölmiðla í fjórar vikur eftir tilræðið.
Um taugaeitrið Novichok var 20 mismunandi sögum dreift. Ein þeirra hljóðaði upp á að það hafi eða gæti komið frá Porton Down sem er tilraunastofa á vegum breska hersins nærri Salisbury. Önnur var að eitrið væri ekki frá Rússlandi. Sú þriðja að það væri frá Rússlandi en ekki frá ríkinu. Fjórða var að Novichok hefði ekki verið notað. Sú fimmta að hugsanlega hefði Skripal sjálfur átt eitrið. Sú sjötta að Rússar hefðu eytt öllum birgðum sínum af eitrinu eftir hrun Sovétríkjanna. Sú sjöunda að Rússa hefðu aldrei átt Novichok og sú áttunda að eitrið gæti verið frá öðru fyrrum ríki Sovétríkjanna.
Rússnesku ríkisfjölmiðlarnir reyndu sem sagt ekki endilega að sannfæra almenning um að þeirra útgáfa af sögunni væri sönn. Þess í stað var reynt að dreifa svo mörgum mismunandi sögum að fólk væri í vafa um hvað væri satt og hvað væri logið.
Dr. Gordon Ramsay, sem vann að rannsókninni, sagði í tengslum við útgáfu hennar að fréttir RT og Sputnik af málinu hafi borið öll einkenni villuleiðandi fréttaflutnings. Reynt hafi verið að sá efasemdum og óvissu með því að flytja margar misvísandi fréttir og samsæriskenningar.
Skripalfeðginin eru nú í felum og njóta lögregluverndar.
