Jay Barrett, 44 ára, býr í Connecticut. Hann þjáist af banvænum sjúkdómi. Í síðustu viku útskrifaðist hann af sjúkrahúsi og flutti heim til systur sinnar, Bridgette Hoskies, en þar ætlar hann að eyða síðustu ævidögunum og mun hann fá líknandi meðferð þar.
Barrett er mikill aðdáandi Trump og vildi helst af öllu ræða við forsetann. Systir hans situr í bæjarstjórn í West Haven, þar sem þau búa, og er „100 prósent demókrati“ en hún vildi allt fyrir bróður sinn gera og því birti hún ákall á samfélagsmiðlum og skýrði frá ósk bróður síns. Fljótlega fóru vinir og kunningjar að senda tölvupósta til Hvíta hússins til að vekja athygli á málinu.
Á þriðjudaginn bar þetta árangur því þá hringdi Trump í Barrett. Barrett sagði forsetanum að hann styddi hann í gegnum súrt og sætt. Trump sagði Barrett að hann væri sannur sigurvegari og að hann fengi fljótlega persónulegt bréf frá sér.
„Þú ert maður að mínu skapi, Jay. Ég er stoltur af þér.“
Sagði Trump og bætti við:
„Ég mun tala við þig aftur Jay. Ókei? Þú heldur bara áfram að berjast. Við berjumst báðir.“
New Haven Register hefur eftir Barrett að Eric Trump, sonur forsetans, hafi einnig hringt í hann.
Barrett kaus Barack Obama 2008 en var ósáttur við stefnu hans og aðgerðir, sérstaklega sjúkratryggingakerfið Obamacare. Hann segist því hafa áttað sig á að hann væri repúblikani og hann heillaðist af hugmyndum og stefnu Trump þegar hann barðist um forsetastólinn við Hillary Clinton.
