Teresa Lynne Roth, 34 ára, frá Georgíu í Bandaríkjunum var handtekin í síðustu viku á heimil sínu í Gainesville eftir fjögurra mánaða langa rannsókn lögreglunnar. Hún er grunuð um að hafa svikið bætur út úr hinu opinbera með því að láta ungan son sinn sitja í hjólastól og láta sem hann væri fatlaður. Hún sagði hann meðal annars ófæran um að matast nema hvað hann gæti notað rör til að matast.

New York Post skýrir frá þessu. Sonur hennar er nú fimm ára. Roth er sögð hafa látið hann nota hjólastól síðustu tvö ár og að hafa logið um veikindi hans og fötlun. Á þessum tveimur árum gaf hún honum 28 ónauðsynleg lyf.

Scott Warren, lögreglumaður, sagði að Roth hafi látið son sinn þjást andlega og líkamlega með því að láta hann taka ónauðsynleg lyf og spila hættuspil með heilsu hans.

Málið fór af stað þegar sonurinn var lagður inn á barnasjúkrahús í Atlanta. Læknar hófu meðferð við margvíslegum sjúkdómum sem áttu að hrjá hann en í ljós kom að þeir voru allir skáldskapur. Þeir gerðu barnaverndaryfirvöldum viðvart og var drengurinn tekinn úr umsjá móður sinnar.

Hann var þá með súrefniskút og var mataður í gegnum rör og sat í hjólastól en ekki var þörf á neinu af þessu.

Roth hefur verið úrskurðuð í gæsluvarðhald.