Svona er Twitterfærsla frá Natacha Jaitt, fyrrum Playboy-fyrirsætu, frá því í apríl á síðasta ári. Hún skrifaði þetta eftir að henni höfðu borist hótanir en í kjölfar þeirra óttaðist hún um líf sitt.
Hún fannst látin um helgina í Buenos Aires í Argentínu. Hún var nakin en hún hafði verið í samkvæmi.
Jaitt óttaðist um líf sitt eftir að hún hafði í sjónvarpi ásakað marga þekkta stjórnmálamenn, fréttamenn, skemmtikrafta og íþróttastjörnur um að vera viðriðnir vændisstarfsemi þar sem börn og ungmenni væru seld. Hún sagði meðal annars að náinn vinur Frans páfa væri viðriðinn málið. Af þessum sökum skrifaði hún tístið til að vernda sjálfa sig.
Buenos Aires Times segir að Jaitt hafi tekið inn mikið magn af kókaíni og LSD í samkvæminu og hafi drukkið mikið kampavín.
Jaitt lést þegar líffæri hennar gátu ekki starfað lengur vegna vímuefnaneyslunnar. Engin merki um ofbeldi sáust á líkinu. Bróðir hennar telur samt sem áður að hún hafi verið myrt. Lögmaður hennar er sama sinnis. Lögreglan er því enn að rannsaka málið og yfirheyra aðra veislugesti.
Dauði hennar hefur vakið mikla athygli enda má segja að hún hafi sjálf spáð fyrir um hann í fyrrgreindu tísti sínu á síðasta ári. Samsæriskenningar hafa því farið á flug á samfélagsmiðlum í kjölfar andláts hennar.
„Hún vissi af þeirri hættu sem hún setti sig í. Ég er ekki mikill samsæriskenningamaður . . . En eigum við virkilega að trúa því að hún hafi ljóstrað upp um þetta og síðan bara tekið eigið líf á dularfullan hátt?“
Sagði einn Reddit-notandi og annar bætti við:
„Það hlýtur að vera erfitt að búa yfir upplýsingum um eitthvað svona alvarlegt og um leið svo viðkvæmt að fólk trúir þér kannski ekki og ef það gerir það þá getur þú verið drepinn. Það er eins og heimurinn verði sífellt dekkri.“
