Í framtíðinni mun smámynt, sem fólk kastar í Trevi gosbrunninn í Róm, enda í borgarsjóði í stað þess að enda hjá góðgerðarsamtökum eins og verið hefur fram að þessu. Borgarstjórnin ætlar að nota peningana til framkvæmda og viðhalds í borginni sjálfri. Hér er ekki um neina smáaura að ræða því daglega er að meðaltali um 4.000 evrum kastað í gosbrunninn.

Þessi ákvörðun borgarstjórnarinnar hefur vakið mikla reiði meðal almennings og hefur borgarstjórnin og borgarstjórinn, Virginia Raggi, fengið að heyra það. „Óvinir fátækasta fólksins“ og „peningar teknir frá þeim fátækustu“ er meðal þess sem hefur verið haft á orði um þessa ákvörðun. The Telegraph skýrir frá þessu.

Hingað til hafa peningarnir runnið til kaþólsku hjálparsamtakanna Caritas og hafa þeir verið nýttir til að aðstoða fátæka og heimilislausa borgarbúa. En frá 1. apríl mun borgarsjóður taka peningana til sín.

Það var dagblaðið Avvenire, sem er gefið út af samtökum ítalskra biskupa, sem hóf umræðuna á laugardaginn með forsíðufrétt sinni undir fyrirsögninni: „Peningar teknir frá þeim fátækustu.“

Margir Rómarbúar og Caritas saka borgarstjórann um að vera óþokkinn í málinu. Aðrir eru hins vegar þeirrar skoðunar að peningarnir eigi ekki að renna til kirkjunnar heldur til borgarsjóðs.

Samkvæmt þjóðtrú fylgir því gæfa að henda mynt í gosbrunninn og hefur hún ekki farið framhjá ferðamönnum sem heimsækja borgina. Caritas hefur fengið peningana óslitið frá 2001.

Deilurnar um gosbrunninn hófust á síðasta ári en lágu niðri þar til nú í ársbyrjun vegna mikillar gagnrýni. Málið bætist við vaxandi óánægju með borgarstjórn og borgarstjórann Virginia Raggi. Hún hefur verið borgarstjóri síðan 2016 fyrir Fimmstjörnuhreyfinguna. Bæði hún og flokkurinn hafa verið í miklum mótvindi undanfarið venga mikilla skulda borgarinnar og aðgerðarleysis varðandi loftmengun og niðurníddra innviða sem er á köflum til mikillar hættu.