Þetta kemur fram í gögnum málsins en Arizona Central hefur fengið aðgang að þeim. Segir blaðið að í upphafi hafi skilaboðin ekki verið ógnandi en þau fóru að vera það eftir að lögreglan varð dag einn að fjarlægja konuna frá húsi mannsins. Ekki hefur verið skýrt frá nafni hans en bandarískir fjölmiðlar segja að hann sé forstjóri fyrirtækis sem selur snyrti- og húðvörur.
Fólkið komst í samband við hvort annað í gegnum stefnumótasíðuna Luxy en hún er ætluð fólki sem hefur meira en 500.000 dollara í árslaun. Eftir að hafa skipst á skilaboðum í gegnum síðuna í nokkra daga ákváðu þau að hittast. En stefnumótið gekk ekki alveg eins og maðurinn hafði átt von á og sagði hann konunni að hann hefði ekki áhuga á að hitta hana aftur. Það dró ekki mátt úr henni eða áhuga á manninum og sendi hún honum allt að 500 skilaboð á dag. Þá birtist hún að minnsta kosti tvisvar við heimili hans næsta hálfa árið.
Í apríl á síðasta ári, tíu mánuðum eftir stefnumótið, var maðurinn erlendis og þá braust konan inn í hús hans. Þegar lögreglan kom á vettvang var Jacquelin í baði. Aðspurð sagðist hún hafa búið til sögu í höfði sér um að hún ætti heima í húsinu.
„Á undanförnum mánuðum hefur hann sagt mér að ég eigi að hverfa úr lífi hans en ég get það ekki því ég elska hann sífellt meira með hverjum deginum.“
Sagði hún við lögreglumennina. Þegar þeir leituðu í bíl hennar fundu þeir stóran eldhúshníf.
Mál Jacquelin verður tekið fyrir hjá dómstól í Arizona í byrjun febrúar en hún er ákærð fyrir að hafa ofsótt manninn og að hafa farið í óleyfi inn í garð hans og heimili. Hún neitar sök. Við yfirheyrslur hjá lögreglunni sagði hún að hún hafi ekki ætlað að vinna honum mein.
„Það kom eitthvað yfir mig. Það er í lagi mín vegna ef einhver önnur fær hann. Hann er svo góður. Ég skil bara ekki að hann sé hræddur við mig.“
Sagði hún í yfirheyrslu hjá lögreglunni.
