Lögreglan á Fjóni í Danmörku hélt fréttamannafund fyrir stundu þar sem farið var yfir stöðu rannsóknar hins hræðilega lestarslyss sem átti sér stað á Stórabeltisbrúnni í gærmorgun. Meðal þess sem kom fram er að tvö lík til viðbótar fundust í lestinni í nótt. Tala látinna er því komin upp í átta en í gær var staðfest að sex hefðu látist og sextán slasast.

Svo virðist sem tengivagn fyrir flutningabíl hafi fallið af vöruflutningalest og á farþegalest sem mætti flutningalestinni á vestanverðri brúnni um klukkan 7.30 í gærmorgun. Tengivagninn lenti á fremsta vagni farþegalestarinnar og létust allir þeir sem sátu vinstra megin í þeim vagni.

Fimm karlar og þrjár konur létust í slysinu. Lögreglan hefur borið kennsl á fjögur lík og unnið er að því að bera kennsl á hin fjögur. Það er erfitt starf að sögn lögreglunnar þar sem líkin eru mjög illa farin, með alvarlega áverka og því þarf að styðjast við tannlæknaskýrslur og DNA-rannsóknir við rannsóknina.

Lögreglan hefur ekki skýrt frá ástandi þeirra sem slösuðust.