Eins og alltaf hjá U2 var sviðið og öll tæknivinna framúrskarandi og mikið lagt í allt. Stórsveitin lét bíða eftir sér á svið en þegar hún steig loks á stokk 20 mínútur yfir átta ætlaði allt að ærast í Royal Arena. En áður en U2 hóf kvöldið með laginu Blackout var áhrifamikið myndband sýnt á risaskjám í salnum. Undir dynjandi takti og upplestri, sem var samsettur með rödd Charlie Chaplin, var varað við uppgangi popúlista og þjóðernissinna víða um heim sem og uppgangi einræðisherra. Kannski var engin tilviljun að undir þessu birtust myndir af Erdogan (Tyrklandsforseta), Pútín (Rússlandsforseta) og Donald Trump (Bandaríkjaforseta) auk fleiri umdeildra þjóðarleiðtoga.
Síðan hófst tónlistarflutningurinn og stóð sveitin á sviðinu samfleytt í nær tvær og hálfa klukkustund. Inn á milli laga spjallaði Bono við áheyrendur og vék að ýmsu. Hann sagði að yfirstandandi tónleikaferð sé einhverskonar uppgjör sveitarinnar við sjálfa sig þar sem þeir hafi á ákveðnum tímapunkti áttað sig á að þrátt fyrir að sveitin væri besta rokkhljómsveit heims þá væru þeir fjórmenningarnir engar hetjur. Hetjurnar væru slökkviliðsmenn, hjúkrunarfræðingar, kennarar og aðrir sem sinna álíka störfum sem eru nauðsynleg til að samfélagið geti virkað sem skal. Þeir félagarnir hafi verið orðnir góðir með sig en fyrir því hafi ekki verið neitt undirlag, þeir væru bara fjórir venjulegir Írar sem búi til tónlist, séu ekki hetjur.
Danskir stjórmálamenn fengu sinn skammt hjá Bono sem gagnrýndi þá harðlega fyrir að hafa sett lög sem heimila að verðmæti séu tekin af flóttamönnu, skartgripalögin svokölluðu. Enn harkalegri var gagnrýnin á Jimmie Åkeson, leiðtoga Svíþjóðardemókratanna, en Bono brá sér nánast í líki kölska og heilsaði að nasistasið þegar hann vék orðum að honum. Flóttamannamálin voru Bono einnig hugleikin og það var einnig uppgangur popúlista í Evrópu og hættan á að Evrópusambandið liðist í sundur. Bono minnti á að ESB hefði að markmiði að tryggja frið og stöðugleik í Evrópu og það hefði sambandinu tekist enda hefur verið óvenjulega friðsamt í álfunni síðan síðari heimsstyrjöldinni lauk.
Þegar fimmta lag kvöldsins, Beautiful Day, var leikið klöknaði Bono þegar áhorfendur í sætum tóku upp spjöld og mynduðu írsku og dönsku þjóðfánana sitt hvorum meginn í húsinu. Þetta hafði verið skipulagt af aðdáendaklúbbi U2 í Danmörku og vissi hljómsveitin ekkert um þetta fyrir tónleikana.
Hér er lagalisti kvöldsins, í þeirri röð sem lögin voru leikin:
The Blackout
Lights of Home
I Will Follow
All Because Of You
Beautiful Day
The Ocean
Iris (Hold Me Close)
Cedarwood Road
Sunday Bloody Sunday
Until The End Of The World
Elevation
Vertigo
Even Better Than The Real Thing
Acrobat
You‘re the Best Thing About Me
Summer of Love
Pride (In The Name Of Love)
Get Out of Your Own Way
New Year‘s Day
City Of Blinding Lights
Eftir uppklapp tók sveitin síðan þrjú aukalög sem voru:
One
Love Is Bigger Than Anything in Its Way
13 (There is a Light)
