Bennu er nú í um 2,25 milljón kílómetra fjarlægð frá jörðinni. Hann er einhverskonar afgangur frá því að sólkerfið okkar myndaðist fyrir 4,5 milljörðum ára og hefur verið á ferð um það síðan. Vísindamenn telja að Bennu hafi lent í árekstri við jörðina á þeim tíma og hafi hugsanlega skilið eftir sig vatn og lífræn efni sem lögðu síðan grunninn að líf hér á jörðinni.
Osiris-Rex er nú kominn að Bennu og sýni af yfirborði loftsteinsins sýna að þar er að finna vísbendingar um vatn. Þetta getur, að sögn Dante Lauretta sem stýrir verkefninu, verið mjög mikilvæg uppgötvun í tengslum við rannsóknir á upphafi lífsins á jörðinni.
Geimfarið hefur safnað ryki frá Bennu og greint það. Geimfarið kemur síðan aftur til jarðarinnar 2023 með þau sýni sem það hefur þá aflað. Vonast vísindamenn til að það færi okkur nýja vitneskju um sögu sólkerfisins.
Bennu fer sjötta hvert ár í gegnum braut jarðarinnar á eilífðarferðalagi sínu um sólina. 2135 mun braut Bennu liggja á milli jarðarinnar og tunglsins og það gæti haft áhrif á braut hans í framtíðinni. NASA hefur sett Bennu í flokk með „hugsanlega hættulegum“ loftsteinum vegna þessa því ekki er talið útilokað að þá muni braut hans breytast og hann lenda í árekstri við jörðina síðar. Það er þó huggun harmi gegn að líkurnar á þessu eru ekki taldar miklar en ef allt fer á versta veg erum við í vondum málum.
