Konan segir hótelkeðjuna hafa sýnt af sér vanrækslu sem hafi valdið henni „miklum og varanlegum sálrænum skaða sem og tilfinningalegum skaða og öðru tjóni“. Konan krefst bóta fyrir þetta sem og vegna lækinskostnaðar og tekjutaps sem hún telur sig hafa orðið fyrir.
Hún gisti á Hampton Inn and Suites hótelinu, sem er í eigu Hilton, í Albany í New York í júlí 2015. Þar hafði falinni myndavél verið komið fyrir í sturtunni og voru teknar myndir af henni allsnaktri í sturtu eftir því sem segir í stefnunni. Konan hafði enga hugmynd um þetta fyrr en í september á þessu ári þegar hún fékk tölvupóst með fyrirsögninni: „Þetta ert þú, er það ekki?“ Með póstinum fylgdi hlekkur á klámsíðuna þar sem myndbandið hafði verið birt sem og fullt nafn hennar með. Sendandinn sendi henni síðan ítrekaðar hótanir þar sem hann sagðist vita í hvaða háskóla hún hefði gengið og hvar hún starfaði. Hann krafði hana um 2.000 dollara greiðslu fyrir að dreifa myndunum ekki frekar og 1.000 dollara á mánuði í 12 mánuði. Hún svaraði þessu engu og í framhaldinu var myndunum dreift á fleiri klámsíður.
Í tölvupóstum fjárkúgarans kom fram að myndir hefðu verið teknar af fleiri gestum í þessu sama hótelherbergi. Sky skýrir frá þessu.
