Norski ljósmyndarinn Mads Nordsveen datt heldur betur í lukkupottinn þegar hann var í gönguferð í norðurhluta Noregs nýlega. Þá rakst hann á hvítan hreindýrskálf en þeir eru mjög sjaldgæfir og því sjaldséðir. Óvenjulegt útlit þeirra er rakið til gena sem fjarlægja litarefni úr feldi þeirra en ekki er um albinóa að ræða í slíkum tilfellum.

”Hann hvarf næstum í snjónum!”

Skrifaði Nordsveen í texta við mynd, sem hann birti á Instagram, af kálfinum. Meðal Sama, sem búa í norðanverðri Skandinavíu, er það talið mikið gæfumerki að sjá hvítt hreindýr.

BBC hefur eftir Nordsveen að kálfurinn hafi komið mjög nærri honum og þeir hafi horft í augu hvors annars og hafi kálfurinn verið mjög rólegur. Eftir nokkurra mínútna dvöl nærri Nordsveen hélt kálfurinn á brott og fór til móður sinnar sem beið álengdar.