Efni, sem eru notuð í ýmsar heimilisvörur á borð við hársápur, ilmvötn, svitalyktareyða og sápur, geta valdið snemmbúnum kynþroska hjá stúlkum samkvæmt niðurstöðum nýrrar rannsóknar. Rannsóknin beindist að efnum á borð við þalat, paraben og tjörusýru en þessi efni eru notuð í ýmsar vörur sem við notum í hinu daglega lífi.

Sky skýrir frá þessu. Þátttakendur í rannsókninni voru 179 stúlkur sem fæddust í Kaliforníu 1999 og 2000 og 159 piltar sem fæddust á sama tíma í sama ríki. Rannsakað var hversu mikið magn þessara efna var í mæðrunum á meðgöngu og í börnunum við níu ára aldur.

Síðan var kannað hvenær börnin hefðu orðið kynþroska og var niðurstaðan að það flýtti kynþroska stúlkna ef þær höfðu komist í snertingu við fyrrgreind efni en ekki var að sjá að það hefði nein áhrif á piltana.

Kim Harley, sem stýrði rannsókninni, segir að tvö efni hafi reynst áhrifamest. Mæður sem voru með há gildi þalata, sem er notað í ilmvötn, og triclosan, sem er notað í sápur og tannkrem, áttu dætur sem urðu fyrr kynþroska en hinar. Einnig kom í ljós að stúlkur með há gildi paraben í líkamanum við níu ára aldur urðu fyrr kynþroska en hinar.