Kappátskeppni í Sacret Heart University í Bandaríkjunum endaði með ósköpum þegar nemendur við skólann kepptu í hver gæti borðað flestar pönnukökur á sem stystum tíma.

Tvítug stúlka, Caitlin Nelson, tók þátt í keppninni sem reyndist banabiti hennar. Nú hefur móðir hennar stefnt skólanum vegna kappátsins og fer hún fram á bætur vegna dauða dóttur sinnar.

Keppnin var haldin í apríl 2017 en skemmst er frá því að segja að pönnukökurnar stóðu fastar í öndunarvegi Caitlin.

Þegar lögreglumenn og viðbragðsaðilar komu á vettvang var Caitlin í öndunarstoppi og hófust endurlífgunaraðgerðir strax. Þær gengu þó erfiðlega þar sem pönnukökurnar sátu pikkfastar í öndunarveginum. Í stefnunni kemur fram að þær hafi verið eins og steypa.

Caitlin var flutt á sjúkrahús og tókust endurlífgunaraðgerðir að lokum. Súrefnisskortur varð þó til þess að heilastarfsemi Caitlin var svo gott sem engin og voru vélar sem héldu henni á lífi teknar úr sambandi nokkrum dögum síðar.

Í stefnunni fer móðir Caitlin fram á ótilgreindar bætur en hún segir að markmiðið með stefnunni sé einnig að vekja athygli á hættunni sem getur falist í því að troða mat ofan í sig á sem stystum tíma. „Þessar keppnir eru miklu hættulegri en fólk gerir sér grein fyrir,“ segir hún og bætir við að keppnir þar sem fólk til dæmis borðar ís eða þeyttan rjóma séu hættuminni.

Í umfjöllun bandarískra fjölmiðla kemur fram að Caitlin hafi misst föður sinn þann 11. september 2001 en hann starfaði sem lögreglumaður í New York þegar árásarnir voru framdar.