Jaroslav Bobrowski er maður sem getur borðað mikið enda er hann íþróttamaður og þarf mikla næringu til að ná árangri. Hann stundar þríþraut og keppir í járnmanni (Ironman). Áður var hann á kafi í vaxtarækt. Nýlega fór hann inn á sushistað í Landshut í Bæjaralandi og tók til matar síns á hlaðborðinu. En eigandinn var allt annað en ánægður með Bobrowski eða öllu heldur matarlyst hans og hefur bannað honum að stíga fæti inn á staðinn í framtíðinni.

Veitingastaðurinn heitir Running Sushi. Þar er boðið upp á sushi á færibandi og sitja gestirnir við borð sem færibandið fer framhjá. Á færibandinu eru síðan diskar með glæsilegum sushiréttum. Passauer Neue Presse hefur eftir Bobrowski að hann hafi greitt 19,5 evrur fyrir matinn sinn en þetta er einhverskonar hlaðborð þar sem fólk má borða eins mikið og það vill. Nema hvað Bobrowski má það greinilega ekki. Hann borðaði af rúmlega 100 diskum og var eigandanum þá nóg boðið.

„Hann borðar fyrir fimm manns. Þetta er ekki eðlilegt.“

Sagði eigandinn í samtali við Passauer Neue Presse.

Bobrowski fylgir sérstöku mataræði vegna íþróttaiðkunar sinnar en í því felst að hann borðar ekkert í 20 klukkustundir en síðan borðar hann þar til hann er við að springa. Það þurfti sem sagt hráan fisk af rúmlega 100 diskum til að ná því marki.