David Stringer, þingmaður repúblikana í fulltrúadeild þingsins í Arizona, er heldur betur í kastljósi fjölmiðla eftir að myndband þar sem hann er í aðalhlutverk fór í dreifingu á netinu fyrr í vikunni. Myndbandið var tekið upp á fundi þar sem Stringer talaði. Þar sagði hann meðal annars að innflytjendur ógni tilvist Bandaríkjanna og að ekki séu nægilega mörg hvít börn í landinu.

Flokksfélagar Stringer og repúblikanaflokkurinn í Arizona hafa skorað á hann að segja af sér í kjölfar birtingar myndbandsins.

„Það eru ekki nógu mörg hvít börn . . . innflytjendur grafa undan pólitísku jafnvægi . . . innflytjendur eru ógn við tilvist Bandaríkjanna. Ef við gerum ekki eitthvað í innflytjendamálum breytist lýðfræðileg samsetning landsins okkar á óafturkræfan hátt mjög, mjög fljótt og þetta verður gjörbreytt land.“

Segir hann meðal annars í upptökunni.

CNN segir að Stringer saki pólitíska andstæðinga sína um að taka orð hans úr samhengi til að koma höggi á hann. Þeir hafi tekið 51 sekúndu af 16 mínútna ræðu hans til að reyna að blekkja kjósendur.