„Það hefur lengi verið þrætuepli meðal málsmetandi manna hvort ananas eigi heima á pizzum. Við sneiðum hjá þeim átökum og segjum að kærleikurinn eigi svo sannarlega heima á pizzum,“
segir listamaðurinn Tolli Morthens.
Í tilefni af 10 ára afmæli veitingastaðarins Flatbökunnar hafa eigendurnir og Tolli tekið höndum saman og bjóða nú íslendingum að gæða sér á ljúffengum kærleikspizzum í febrúar. Pizzurnar koma í tveimur tegundum, kjöt og grænmetis en báðar eru seldar til stuðnings Sollusjóðsins sem styrkir fanga að lokinni betrunarvist við að aðlagast samfélaginu á ný með menntun, sjálfstyrkingu og sérfræðiaðstoð.
„Það hefur lengi verið þrætuepli meðal málsmetandi manna hvort ananas eigi heima á pizzum. Við sneiðum hjá þeim átökum og segjum að kærleikurinn eigi svo sannarlega heima á pizzum,” segir Tolli sem stendur í stafni verkefnisins ásamt félögum sínum.
Eitt þúsund krónur renna til Sollusjóðs af hverri seldri Kærleiks-pizzu á meðan hún verður á matseðli Flatbökunnar.
Tolli stofnaði ásamt góðum hópi góðgerðarfélagið Bata sem rekur Batahús, sem er úrræði fyrir fanga af báðum kynjum sem koma á ný út í samfélagið í bata.
„Það er nauðsynlegt að brjóta sig öðru hvoru út úr alvarleika verkefnanna og bjóða upp á smá leikgleði. Þetta verkefni er leið fyrir almenning að leggja okkur lið í verkefnum Sollusjóðsins en ekki síður tækifæri til að ræða málaflokkinn sem sannarlega stendur frammi fyrir ýmsum áskorunum. Það þarf að gera það jöfnum höndum en ekki bara þegar út af ber,” segir Tolli.
„Fyrst opnuðum við Batahús fyrir karla sem voru að koma út í lífið eftir betrun en svo fylgdum við því eftir með kvennaúrræði ári seinna. Skilningur og stuðningur ráðherra félagsmála hefur skipt miklu máli. Fyrst með Ásmundi Einari og síðar Guðmundi Inga. Okkur hlakkar til að kynna úrræðin fyrir Ingu Sæland nýjum félagsmálaráðherra.”
Sollusjóður var stofnaður árið 2021 af Bata góðgerðarfélagi og starfar sjálfstætt samhliða því. Tilgangur sjóðsins er að styðja skjólstæðinga Bata við að aðlagast samfélaginu að lokinni fangavist, meðal annars með menntun, sjálfstyrkingu og sérfræðiaðstoð. Frá stofnun hefur Sollusjóður veitt styrki að andvirði tæplega 13 milljóna króna í um 160 mismunandi verkefni. Styrkirnir hafa meðal annars farið í vímuefnameðferð, sjúkraþjálfun, grunn tannlæknaþjónustu, fjölbreytt námskeið og nám í framhaldsskólum. Sjóðurinn gegnir lykilhlutverki í bataferli skjólstæðinga Bata og gerir þeim kleift að nýta sér fjölbreyttar bataaðferðir. Fjármögnun styrkja hefur komið úr ýmsum áttum, en að stórum hluta frá nánasta umhverfi félagsmanna Bata góðgerðarfélags.
Funguys Creative framleiddi sérstakt kynningarmyndband um framleiðslu kærleikspizzunnar sem sannarlega hefur hitt í mark. Þar má sjá þá Tolla og rapparann Kristmund Axel Kristmundsson smíða Kærleikspizzuna frá grunni.
