Í tilefni bóndadagsins, sem fagnar fyrsta degi þorra, hefur Skúbb ísgerð kynnt til sögunnar nýjan og djörfugan ís sem mun aðeins vera í boði í stuttan tíma. Ísinn, sem kallast Þorraísinn  sameinar einstaka bragðtóna og er hannaður til að kveikja í bragðlaukum landsmanna. Ísinn er þróaður í einstöku samstarfi við Helvítis Kokkinn. Ísinn býður upp á óvænta en dásamlega bragðsamsetningu þar sem mjólkurís mætir Helvítis eldpiparsultu með carolina reaper og bláber frá Helvítis Kokkinum.

,,Þetta er fullkomin leið til að fagna bóndadeginum. Þetta er ís fyrir þá sem þora að prófa eitthvað nýtt. Við erum alltaf til í að prófa eitthvað nýtt og skemmtilegt sérstaklega ef það er pínu óhefðbundið. Við elskum ís, við elskum sterkan mat, og hugsuðum með okkur: Af hverju ekki að sameina þetta tvennt og búa til logandi sterkan ís. Það hljómaði bara of vel til að sleppa því,“ segir Jón Jóhannsson hjá Skúbb.

„Við vildum skapa eitthvað alveg nýtt fyrir bóndadaginn. Samstarfið við Helvítis Kokkinn hefur gert okkur kleift að bjóða upp á ís sem sameinar sætan mjólkurís og mjög sterkan með kryddaðri eldpiparsultu með Carolina reaper og bláber.

Þetta samstarf varð til af hreinni forvitni og gleði – við bara gátum ekki annað en látið vaða. Útkoman er spennandi og einstakur ís sem bæði kitlar bragðlaukana og lætur fólk svitna aðeins,“ segir Jón.

Sultur frá Helvítis Kokkinum hafa notið vinsælda fyrir einstaka bragðtóna, og saman skapar hún og ísinn óvænta upplifun fyrir bragðlaukana. Þorraísinn verður í boði í takmörkuðu magni og einungis í Skúbb ísbúðinni á Laugarásvegi.