Nú er komin helgi og er upplagt að gera sér dagamun og fá sér eitthvað ljúffengt með kaffinu. Þó við fáum okkur góða köku þarf ekki að vera sykur, Linda Ben okkar sér um það. Hér höfum við alveg dásamlega góða súkkulaði ostaköku sem inniheldur engan sykur úr smiðju Lindu sem er fullkomin með helgarkaffinu. Hún smakkast þó eins og venjuleg ostakaka, áferðin er silkimjúk og sæt á bragðið.
„Það sem gerir hana svona góða er súkkulaðismjörið frá Good Good en það er gert út stevíu,“ segir Linda.
Til þess að gera þessa ostaköku þá mylur maður kex úr höfrum og blandar saman við smjör. Pressar í smelluform (eða beint á kökudisk með aðeins hringinn af smelluforminu á kökudiskinum) og setur í frysti.
Svo blandar maður saman rjómaosti og súkkulaðismjörinu. Þeytir rjóma og blandar því saman við súkkulaíblönduna. Setur það svo ofan á kexbotninn og setur í frysti. Síðast setur maður brætt súkkulaðismjör ofan á kökuna og ber hana fram. Það er því kjörið að gera þessa köku með góðum fyrirvara þar sem hún geymist í frysti. En ef þið eruð á hraðferð þá er nóg að frysta hana í 3-4 klukkustundir til að hún taki sig.
Síðan er ótrúlega gaman og fallegt fyrir augað að skreyta hana með lifandi blómum eins og Linda gerir hér. Hægt er að fylgjast með matarblogginu hennar Lindu á síðunni hennar Linda Ben.
Sykurlaus súkkulaði ostakaka
200 g hafrakex (sykurlaust t.d. hrökkbrauð)
100 g smjör
500 ml rjómi
400 g rjómaostur
350 g súkkulaðismjör frá Good Good (skipt í 250 g og 100 g)
Bræðið smjörið og myljið kexið, blandið því saman. Smyrjið 23 cm smelluform og pressið blöndunni í botninn. Setjið í frysti. Hrærið saman rjómaostinum og súkkulaðismjörinu. Þeytið rjómann og blandið honum varlega saman við súkkulaðiblönduna með sleikju. Hellið yfir kexbotninn og setjið aftur í frysti og geymið í a.m.k. 3-4 klukkustundir. Setjið restina af súkkulaðismjörinu í örbylgju u.þ.b. 15 sekúndur, hrærið því saman og hellið svo yfir kalda kökuna, dreifið úr með spaða þannig súkkulaðismjör hjúpi kökuna efst. Gott er að taka kökuna úr frysti 1 klukkustund áður en hún er borðuð.
