Það styttist óðum í Valentínusardaginn og af því tilefni birtist þessi uppskrift í Frímínútum í Fréttablaðinu á föstudaginn síðastliðinn. Frímínútur er fastur liður alla föstudaga og liðnum fylgir ávallt uppskrift sem á vel við. Þar sem Valentínusardagur er framundan er lagt til að gera vel við sig og sína og leyfa sér unaðslega góða eftirrétt sem gleður bæði auga og munn. Eins og margir vita þá bættist við Royal búðinga flóruna á dögunum, Royal Pipp búðingur sem hefur eflaust glatt Royalista landsins. Uppskriftin ber keim af þessum búðing í skemmtilegri eftirréttar útgáfu með rómantískri útfærslu í tilefni Valentínsardagsins. Þennan verðið þið að prófa með eða án súkkulaði Ganache.
Unaðslegi Pippistinn
Fyrir 4 – 6 glös (fer eftir stærð)
Unaðslegi Pippistinn/eftirrétturinn
1 pk Pipp Royal búðingur
250 ml rjómi
250 ml nýmjólk
Byrjið á því að píska eða þeyta allt saman í um það bil eina mínútu eða þar til blandan fer aðeins að þykkna. Skiptið blöndunni niður í falleg glös, til dæmis á fæti og kælið að minnsta kosti í 30 mínútur. Á meðan gefst tækifæri til að gera súkkulaðisósuna – eða súkkulaði ef vill en það er ekki nauðsynlegt að vera með sósuna með. Dugar að toppa eftirréttinn með rjóma og skreyta.
Súkkulaði Ganache
100 g pralín súkkulaði (56% dökkt)
1 stk. Pipp (40 g)
100 ml rjómi
Setjið rjómann í pott og hitið að suðu. Brjótið súkkulaðið niður í skál og hellið rjómanum yfir þegar hann hefur náð suðu. Látið standa í eina til tvær mínútur og hrærið þá saman með písk eða gaffli þar til það er vel blandað saman og kekkjalaust. Kælið í ísskáp fyrir notkun svo rjóminn bráðni ekki ef súkkulaði er sett yfir eftirréttinn.
Setjið síðan 1-2 matskeiðar af súkkulaðisósunni yfir eftirréttinn (eftir smekk), kælið aftur í nokkrar mínútur (til þess að þeytti rjóminn leki ekki til). Eftirrétturinn er líka syndsamlega góður án súkkulaði Ganache.
Toppur
250 ml þeyttur rjómi
Hnífsoddur af ferskri vanillu (má sleppa)
1 msk. flórsykur
Fersk mintulauf
Setjið rjómann í sprautupoka með stútt sem við á eða í rjómasprautu og sprautið rjómanum í hring. Skreytið með mintulaufi, pippbita og jafnvel með blómum.
