Hér er á ferðinni hin fullkomna janúar kaka, þar sem margir eru að sneiða hjá sykrinum eftir jólin, syndsamlega góð og líka svo falleg. Þessi hentar ótrúlega vel sem fyrsta afmæliskakan eða í afmælin þegar maður vill bjóða upp á köku en ekki uppfulla af sykri. Heiðurinn af þessari dásemd á Guðrún Ýr Eðvaldsdóttir sem heldur úti heimasíðunni Döðlur og smjör.

Guðrún segir að þessi dásemd hafi slegið í gegn hjá fólki á öllum aldri á hennar heimili og það sé í raun synd að hún hafi ekki deilt uppskriftinni fyrr.

„Svo er krönsið svo gott ofan á að ég prófaði að gera það eitt og sér og vá hvað ég mæli með því í möffins form eða á plötu og skorið í bita. Fullkomið á svona eftirréttaplatta sem eru vinsælir núna, paraðir saman með til dæmis jarðarberjum, melónum og döðlum. Þá er gott að tvöfalda uppskriftina,“ segir Guðrún.

Við getum svo sannarlega mælt með þessari með helgarkaffinu.

Hin fullkomna súkkulaðikaka – Janúarkakan

10 döðlur

1 banani

3 egg

4 msk. kókosolía

½  dl kaffi

40 g kakó

65 g möndlumjöl

1 ½  tsk. lyftiduft

1 tsk. vanilludropar

Byrjið á því að stilla ofninn á 175°C. Steinhreinsið döðlurnar og setjið í blandara ásamt banana, eggjum, kókosolíu og kaffi, ef þið viljið sleppa kaffinu er gott að skipta því út fyrir mjólk/jurtamjólk, blandið vel saman. Hellið yfir í skál og blandið þurrefnunum og vanilludropum saman við. Smyrjið 20 sentimetra form með Pam spreyi og hellið deiginu í formið, bakið í 25-30 mínútur. Leyfið að kólna.

Ofan á

1 banani

2 msk. kókosolía

100 g Rjómasúkkulaði án viðbætts sykurs frá Nóa Síríus

2 dl Kelloggs Cornflakes

Byrjið á því að setja kökuna á disk. Skerið þá bananann í sneiðar og dreifið yfir kökuna. Blandið kókosolíu og súkkulaði saman í skál, bræðið í örbylgjuofni og hrærið vel saman. Hellið þá kornflexi saman við og hrærir aftur vel. Dreifið yfir kökuna. Gott er að bera kökuna fram strax eða geyma hana í kæli þangað til að hún er borin fram. Njótið vel.