Nú er haustrútínan komin á fullt og skólastarf komið í fastar skorður á öllum skólastigum. Allir þurfa að nærast og sumir þurfa að útbúa nesti til að taka með í skólann eða vinnuna. Þá er gott að fá nýjar og ferskar hugmyndir af einföldum réttum. Hér erum við með ótrúlega einfalt, hollt og gott pastasalat sem hentar vel sem nesti, hvort sem það er í skólann eða vinnuna sem kemur úr smiðju Berglindar Hreiðars, matar- og lífsstílsbloggara hjá Gotterí og gersemar. Það er hægt að undirbúa þetta allt og setja í sitthvort boxið í ísskápinn og síðan getur hver og einn sett saman salat eftir eigin ósk og stjórnað þannig magni af hverju hráefni.

Pestó pastasalat

Einn skammtur  (mælum með að gera nokkra í einu)

100 g pasta að eigin vali

30 g Classic Basil pestó frá Sacla

1 msk. ólífuolía

½ dós ORA túnfiskur í vatni

Nokkrir piccolo tómatar

Nokkrar mozzarellaperlur

Fersk basilíka

½ harðsoðið egg

Sjóðið pasta í söltu vatni og kælið. Blandið pestó + ólífuolíu saman við með sleikju og setjið í nestisbox/skál. Setjið túnfiskinn ofan á ásamt öðrum hráefnum og njótið.