Mánudagar eru fiskdagar hjá mörgum og ekkert er betra en fiskur í sælkerabúningi. Hér kemur ótrúleg einfaldur og ljúffengur grískur fiskréttur úr smiðju Lindu Ben sem heldur úti uppskriftarsíðunni Linda Ben.

Rétturinn er léttur og inniheldur mikið grænmeti sem er bakað í ólífu olíu- sítrónulegi. Úr verður alveg stórkostlega djúsí og bragðmikill réttur sem er virkilega einfaldur í framkvæmd. Það má með sanni segja að þetta sé sælkeraréttur sem þið verðið að prófa.

Grískur fiskréttur að hætti Lindu Ben

450 g þorskhnakkar

2 msk. ólífu olía til steikingar

2 msk. smjör

3 msk. ólífu olía

Safi úr 1 sítrónu

1 dl hveiti

1 tsk. cumin

1 tsk. paprika

1 tsk. túrmerik

1 tsk. kóríander

½ pakki forsoðnar parísarkartöflur

½-1 rauð paprika

125 g kirsuberjatómatar

2 hvítlauksgeirar

1 krukka feta ostur

nokkrar ólífur, helst svartar en annars grænar

Salt og pipar eftir smekk

Fersk steinselja eftir smekk

Aðferð

Byrjið á því að kveikja á bakarofninum og stillið á 200°C. Bræðið smjörið og blandið út í ólífu olíu og sítrónu safa. Setjið hveiti í skál og bætið kryddunum saman við (ekki salt og pipar, það fer seinna), blandið vel saman. Skerið þorskhnakka flakið í hæfilega stóra hluta, mér fannst gott að skipta því í þrjá hluta. Setjið hvern bita í olíu/smjör/sítrónu blönduna þannig hann blotni vel og hjúpið bitann svo í hveitiblöndunni. Hitið 2 matskeiðar af ólífuolíu á pönnu þangað til pannan er mjög heit en ekki rjúkandi heit. Steikið bitana í um það bil 3 mínútur á hvorri hlið (það er óþarfi að elda fiskinn í gegn þar sem hann er fulleldaður í ofni)

Á meðan fiskurinn er á pönnunni, raðið þá kartöflum, paprikubitum, kirsuberjatómötum og ólífunum í eldfast mót. Setjið fiskinn svo ofan á grænmetið, reynið að setja hann svolítið ofan í grænmetið. Skerið niður tvö hvítlauksgeira smátt niður og dreifið honum yfir réttinn.

Hellið restinni af olíunni/smjör blöndunni yfir og dreifið svo fetaosti yfir allt saman. Kryddið með salti og pipar. Bakið inn í ofni í 15 mínútur eða þangað til osturinn verður gullinbrúnn.

Stráið  að lokum ferskri steinselju yfir. Njótið vel.