Helgarmatseðillinn að þessu sinni er í boði þáttarins Matur og heimili á Hringbraut en allar uppskriftirnar eiga það sameiginlegt að þær hafa verið gerðar í þættinum og/eða birst á síðu þáttarins og notið mikilla vinsælda. Hér má sjá síðu þáttarins Matur og heimili.
Sumarið er komið og þá er upplagt grilla nokkur kvöld og njóta ljúffengra sælkerakræsingar sem boða sumar og sól. Gaman er að vera með sjávarfang, létta rétti og toppa svo vikuna með því setja eitthvað spennandi á grillið. Til að mynda mælum við með syndsamlega góðu grilluðu tígrisrækjusalati og ekta írönsku kebab og fiski-taco sem lætur engan ósnortinn.
Flest okkur þekkjum við það vel að vera stundum í tímaskorti þegar kemur að eldamennskunni og samt langar okkur í eitthvað ómótstæðilega gott sem kitlar bragðlaukana. En hér bjóðum við líka upp á nokkrar rétti sem eiga tekur örskammastund að töfra fram.
Á föstudagskvöldi mælum við með tígrisrækjusalatinu sem er lauflétt og bragðgott og tekur örskamma stund að framreiða þegar búið er að marínera rækjurnar.
Föstudagur – Aðalréttur
https://www.frettabladid.is/lifid/kolagrill-gefur-karakter-i-grillmatinn/
Tígrisrækjusalat
1 poki tígrisrækjur, frosnar, afþíðið
Marínering fyrir tígrisrækjurnar
300 g olía
50 g srirachasósa
200 g milt chillipaste
30 g túrmerik
50 g reykt paprikuduft
20 g salt
10 g svartur pipar
30 g hvítlauksduft
1 box blandað salat frá Lambhaga
Blandið öllu saman og marínerið rækjurnar. Leyfið rækjunum að liggja í maríneringunni í sólarhring inni í kæli. Fyrir grillunina þræðið rækjurnar upp á grillspjót og grillið. Það tekur örskamma stund að grilla þær.
Á laugardagskvöldi mælum við með þessum dásamlegu írönsku réttum sem gaman er að flétta saman og bera síðan fram með góðum grjónum, kaldri jógúrtsósu og hummus og toppa með flatbrauði.
Laugardagur – Aðalréttur
https://www.frettabladid.is/frettir/matarastin-tengdi-fjolskyldurnar-saman/
Kjúklinga kebab
50 g smjör
2 stórir laukar
1 stk. heill kjúklingur
2 msk. hrein jógúrt
4 msk. ólífuolía
Salt og pipar eftir smekk
Saffran eftir smekk og leyst upp í vatni
Skerið laukinn í smáa bita. Skerið kjúklinginn niður í bita á disk með lauknum. Bætið ólífuolíu, saffran blöndunni, salti og pipar saman og þekið kjúklinginn með blöndunni. Hyljið vel og setjið í kæli í fjórar klukkustundir. Þræðið kjúklingabitana á spjót og gætið að því að sömu kjötbitar svo sem bringa fari á sama spjót, gætið einnig að því að laukurinn sé ekki á kjúklingnum því hann brennur auðveldlega. Setjið laukinn á annað spjót. Grillið við jafnan hita á kolagrilli.
Á meðan er smjörið brætt með saffran, þegar um tvær mínútur eru eftir af eldun skal smyrja kjúklinginn með þessari blöndu. Það kemur í veg fyrir að kjúklingurinn verði of þurr og gefur honum fallegan lit.
Koobideh kebab
500 g laukur
500 g nautahakk
500 g lambahakk
4 tómatar
1 tsk. saffran krydd
Salt og pipar eftir smekk
Byrjið á því að saxa laukinn afar smátt jafnvel í matvinnsluvél, skiljið laukvatn frá og takið til hliðar. Saxið hakkið enn smærra ef hægt er. Setjið kryddið út í kjötblönduna ásamt lauknum. Hnoðið allt saman, notið vatn svo kjötblandan festist ekki við hendurnar. Leggið yfir plastfilmu og geymið í ísskáp í tvær klukkustundir. Hnoðið aftur og bætið við laukvatninu. Bleytið hendur með laukvatni og búið til lengjur á grillspjót, og hafði smá holóttar fyrir betri eldun. Grillið á kolagrilli, einnig tómatana. Berið kebabið fram með flatbrauði og/eða hrísgrjónum.
Barberry pilaf kjúklingur
4 bollar hrísgrjón
1 laukur
2 hvítlaukslauf
25 g smjör
4 bitar af kjúklingi
1 tsk. sítrónusafi
Salt, pipar, túrmerik, kanill og karrí eftir smekk
2 tsk. tómatpaste
Ein únsa sykur
Saffran krydd
Byrjið á því að hita pönnu á lágum hita og bætið við ólífuolíu, bætið síðan við kjúklingabitunum. Hitið kjúklinginn við lágan hita á pönnu, hækkið svo hitann setjið lok á. Hitið í fimm mínútur og athugið hvort kjúklingurinn sé fulleldaður, snúið við og lokið aftur í fimm mínútur. Saxið lauk og hvítlauk og steikið með kjúklingnum. Bætið síðan við öðrum hráefnum á pönnuna ásamt 2-3 glösum af vatni. Lokið og látið malla á lágum hita í um það bil 2 klukkustundir, bætið við olíu við eftir þörfum. Bætið við saffran sem leyst hefur verið upp í vatni.
Sunnudagarnir mega vera slökunardaga og ljúft að fá sér létt sjávarfang sem gleður bæði líkama og sál. Við mælum því með þessu dásamlega Fiski-taco úr smiðju Elísu Viðars.
Sunnudagur – Aðalréttur
https://www.frettabladid.is/lifid/hollt-og-gott-fiski-taco-a-htti-elisu/
Fiski-taco að hætti Elísu
450 g þorskhnakkar
4 msk. ólífuolía
½ sítróna eða lime (safi)
½ poki taco-kryddblanda
Blandið saman olíu, sítrónu eða lime og taco-kryddi í eldfast mót eða skál. Þerrið þorskhnakkana vel og skerið í litla bita. Leggið bitana í eldfasta mótið og makið kryddleginum á bitana. Fiskinn má elda í ofni við 180°C í 10-12 mínútur eða skella á álbakka og út á grill í 8-10 mínútur. Varist að ofelda fiskinn.
Mangósalsa
½ mangó
⅓ agúrka
⅓ paprika
1 meðalstór tómatur eða nokkrir litlir kirsuberjatómatar
½ lime (safi)
Skerið mangó, agúrku, papriku og tómatana í litla teninga og kreistið lime-safa yfir.
Maísmauk
1 dós maís
2 msk. smjör
Smá salt
Sigtið vatnið af maísnum, hitið maís, smjör og salt í örbylgju eða potti og maukið með töfrasprota.
Avókadósósa
1 dós sýrður rjómi (má vera 50/50 sýrður rjómi og majónes)
½ avókadó
Lime eða sítróna
Salt og pipar eftir smekk
Öll hráefnin sett saman og maukað með töfrasprota eða í matvinnsluvél. Raðið saman fiskinum, mangósalsa, maísmauki og avókadósósu á tortilla-kökur eða taco-skeljar sem eru hitaðar örstutt í ofni eða á grilli áður en hráefnið er sett á þær.
Annan í hvítasunnu er dagur sem upplagt er bjóða heim í léttar kaffiveitingar eða fara í bíltúr og taka með sér smá pikknikk. Hér eru á ferðinni ómótstæðilega góð smjördeigshorn og ostastangir gaman er að bjóða upp á eða taka með í bíltúrinn.
Með kaffinu
Míní smjördeigshorn með Fjallkonumær pestó
1 pakki frosið smjördeig
1 dós af Fjallkonu-pestó frá pesto.is
Rifinn mozzarella ostur
Mini smjördeigshorn með Fjallkonumær pestó
Afþíðið smjördeigið en það tekur um 30 mínútur ef þið takið það úr pakkanum og takið plöturnar í sundur. Fletjið ferningin svo aðeins út með kökukefli en ekki samt of þunnt.
Skerið svo í þríhyrninga eins og gert er þegar gerð eru skinkuhorn (getið séð hér hvernig).
Setjið svo eins og 1/2-1 tsk. af Fjallkonumær pestó á endann og smá rifinn ost ofan á.
Rúllið því svo upp í horn og gott er að klípa endana saman svo það leki ekkert úr þeim.
Bakist í 15-20 mín við 200 C°hita (blástur) eða 210 C°ef þið eruð ekki með blástursofn.
Leyfið þeim svo að kólna eins og í um 30 mínútur.
Parmesan brauðostastangir
1/2-1 pakki af frosnu smjördeigi
Rifinn parmesan ostur
Parmesan brauðostastangir
Takið eina plötu af afþýddu smjördeigi og skerið hana langsum í eins og 1-2 cm lengjur, endurtakið svo við hverja plötu. Snúið svo upp á lengjuna með því að snúa sitthvorn endanum í sitthvora áttina þar til er svona eins og rúllað upp á hana. Raðið þeim á bökunarplötu og spreyið svo með vatni og dreifið rifnum parmesan osti strax yfir. Gott er svo að rúlla þeim upp úr ostinum sem fór niður með hliðunum á plötuna. Stingið inn í 200 C° heitan blásturs ofn eða 210 C° án blásturs í um 15-20 mínútur. Látið svo kólna í eins og 20 mínútur og berið fram með Fjallkonumær pesto eða pesto.is hummus til að dýfa í.
Að lokum er það syndsamlega ljúffengur eftirréttur sem hægt er að bjóða upp á alla daga, bara þegar ykkur langar í pavlovu með löðrandi karamellu sem kætir bragðlaukana.
Eftirréttur
https://hringbraut.frettabladid.is/frettir-pistlar/karamelludraumur-sem-gledur-auga-og-munn/
Karamelludraumur
16-18 stykki eftir stærð
Marengs
4 eggjahvítur
270 g púðursykur
Hitið ofninn í 110°C.
Þeytið eggjahvíturnar þar til þær fara aðeins að freyða. Bætið þá sykrinum saman við í nokkrum skömmtum og skafið niður á milli. Þegar marengsinn er stífþeyttur má færa hann yfir í sprautupoka/zip-lock poka og sprauta litlar bústnar marengskökur á bökunarplötu íklædda bökunarpappír. Takið því næst skeið og mokið aðeins upp úr miðjunni á hverri köku með bakhliðinni á skeiðinni til að búa til pláss fyrir rjómann. Bakið í 70 mínútur og leyfið að kólna inn í ofninum í að minnsta kosti klukkustund áður en þið takið út.
Fylling
600 ml rjómi
150 g Dumle súkkulaðistykki ( 1 ½ 100 g plata)
Þeytið rjómann og saxið súkkulaðið niður. Vefjið súkkulaðinu varlega saman við þeyttan rjómann með sleif og setjið síðan rjómablöndu á hverja marengsköku.
Skraut
50 g dökkt súkkulaði
50 ml rjómi
100 g saxað Dumle súkkulaðistykki
Fersk blóm (má sleppa)
Saxið súkkulaðið smátt og hitið rjómann að suðu. Hellið rjómanum yfir súkkulaðið og pískið saman þar til slétt súkkulaðisósa myndast. Dreifið súkkulaðisósu yfir rjómann og að lokum söxuðu Dumle súkkulaði og blómum sé þess óskað. Berið fram á fallegum kökudisk eftir ykkar smekk.
Njótið vel og góða hvítasunnuhelgi.
