Að lokinni annasamri helgi þar sem bæði Eurovision og borgar- og sveitastjórnarkosningar hafa verið í hámæli er ljúft að enda helgina á ljúffengu sunnudagskaffi á gamla mátann. Berglind Hreiðars einn okkar vinsælasti matarbloggari sem heldur úti síðunni Gotterí og gersemar birti uppskrift af þessari dásemd fyrir nokkru síðan sem er algjör nostalgía.

„Ég er búin að vera í ömmu nostalgíukasti undanfarið og vill helst hafa lambahrygg og ömmukökur í hvert mál,“ segir Berglind. Berglind hefur gaman að því að skoða gamlar uppskriftarbækur frá ömmu sinni og finna þar gullmolana sem minna hana á bernskuna. „Þær eru ófáar sneiðarnar sem ég hef borðað af henni þessari og man ég eftir mér sitjandi á Suðurgötunni með volga marmaraköku og ískalda mjólk á kvöldin, best í heimi.“

Nú er bara að skella í eina marmaraköku.

Marmarakaka

170 g smjör við stofuhita

190 g sykur

2 egg

250 g hveiti

1 ½ tsk. lyftiduft

150 ml mjólk

2 tsk. vanilludropar

3 msk. bökunarkakó

Hitið ofinn 180°C.

Þeytið saman sykur og smjör þar til létt og ljóst. Bætið eggjunum saman við einu í einu og skafið niður á milli. Blandið saman hveiti og lyftidufti og setjið saman við blönduna til skiptis við mjólkina. Að lokum fara vanilludroparnir útí og hrært vel. Setjið um 1/3 af deiginu í vel smurt formkökuform og geymið smá slettu af hvítu deigi í skál (ég set ekki alveg 1/3 því mér finnst gott súkkulaðideigið sé aðeins meira). Bætið bökunarkakó saman við deigið sem eftir er í skálinni og hrærið vel saman. Dreifið úr súkkulaðideiginu yfir það ljósa og setjið svo restina af ljósa deiginu yfir í lokin og sléttið úr. Dragið S-munstur fram og til baka með hníf (alveg niður í botn á forminu) og sléttið aðeins aftur. Bakið í 40-45 mínútur eða þar til prjónn kemur út með smá kökumylsnu, ekki blautu deigi.