Í vikunni bárust stórtíðindi úr höfuðstöðvum Royal að nýr búðingur væri lentur í verslunum landsins. Eins og fram kemur á vef Fréttablaðsins ætlaði allt að verða vitlaust þegar Royal búðingurinn nýi leit dagsins ljós en alla jafna vekja slíkar fréttir mikla athygli enda Royal búðingarnir rótgrónir í þjóðarsálina en viðbrögðin við nýja búðingnum hafa þó verið meiri en gengur og gerist og hafa markaðssérfræðingar sagt að viðbrögðin gefi vísbendingar um að hér sé á ferðinni sælkera búðingur sem enginn Royalisti getur staðist. Nýi búðingurinn hefur rokið úr hillum verslana og starfsfólk Bónus hefur vart undan því að fylla á hillurnar.

Berglind Hreiðars matar- og sælkerabloggari með meiru missti sig strax þegar nýi Royal búðingurinn mætti til leiks og fór beint í það að útfæra sinn uppáhalds búðing þar sem lakkrísinn leikur aðalhlutverkið enda er hún dolfallinn aðdáandi Eitt sett. Berglind fór beint í það að útbúa sína útfærslu af búðingnum góða og birti á síðunni sinni Gotterí og gersemar sem hefur strax slegið í gegn.

„Lakkríssósan og lakkrískurlið passar einstaklega vel með og ég mæli með að þið sem elskið lakkrís farið „all-in“ með sósu og kurl,“segir Berglind sem er alveg dolfallin yfir bragðinu á nýjasta Royalbúðningnum sem hefur þegar sett allt á hliðina.

Hér er uppskrift Berglindar komin fyrir ykkur.

Royalistinn

Fyrir 4 glös

Súkkulaði- og lakkrís búðingur

• 1 pakki Eitt Sett Royal búðingur
• 250 ml rjómi
• 250 ml nýmjólk

1. Pískið eða þeytið allt saman í um eina mínútu eða þar til blandan fer aðeins að þykkna.
2. Skiptið niður í falleg glös/skálar og kælið í um 30 mínútur, gott að gera lakkríssósuna á meðan.

Lakkríssósa

• 150 g lakkrískúlur
• 100 ml rjómi

1. Setjið kúlur og rjóma saman í pott við meðalháan hita og bræðið saman.
2. Þegar slétt lakkríssósa hefur myndast má hella henni úr pottinum yfir í skál/könnu og leyfa að ná stofuhita áður en hún er sett yfir búðinginn.
3. Setjið síðan 1-2 matskeiðar af sósu yfir búðinginn (eftir smekk), kælið aftur í nokkrar mínútur (til þess að þeytti rjóminn leki ekki til ef sósan er enn volg).

Toppur

• 250 ml þeyttur rjómi
• Lakkrískurl
• Smá lakkríssósa

1. Setjið rjómann í sprautupoka með stórum hringlaga stút eða klippið gat á zip-lock poka. Sprautið snúning ofan á hvern búðing.
2. Stráið smá sósu og lakkrískurli yfir.

Njótið í botn.