Í gær opnaði ný og glæsileg mathöll sem ber heitið Pósthús Foodhall sem er nafn með rentu. Höllin er staðsett í sögufrægu húsi við Pósthússtræti 5 á einu frægasta horni miðborgarinnar og er einstaklega falleg þar sem glæsileikinn og hlýleikinn fara vel saman. Mathöllin er hönnuð af Leifi Welding sem er einnig einn af eigendum mathallarinnar en með eigendur hans eru Hermann Svendsen, Ingvar Svendsen og Þórður Axel Þórisson en Þórður er jafnframt framkvæmdastjóri fyrirtækisins. Í Pósthúsinu er fjöldi veitingastaða þar sem boðið eru upp á sælkerakræsingar og allir ættu að finna eitthvað við sitt hæfi.

Mikið var um dýrðir í Pósthúsinu í gær og fjölmargir fögnuðu opnun mathallarinnar og gæddu sér á sælkeraréttum og pitsum sem glöddu bæði auga og munn.

„Fyrir tæpum sex árum settumst við félagarnir niður og lögðum grunninn að Foodhall concepti sem við vildum búa til. Og fyrir fimm árum síðan hófust viðræður við Reiti um það húsnæði sem við höfum nú opnað í, á þeim tíma hafði ein mathöll opnað á Íslandi. Hugmyndin var alltaf að opna skemmtilega mathöll. Við vildum skapa andrúmsloft og umgjörð sem væri á sama tíma skemmtileg og hlýleg, sem héldi utan um þig og kallaði fram bros og gleði,“ segir Leifur.

„Við vildum eins fá til liðs við okkur fremsta fagfólk í veitingageiranum til þess að skapa hágæða veitingastaði, og það hefur svo sannarlega gengið eftir. Við vorum það heppnir að það komust mun færri að en vildu þar sem þeir aðilar sem við kynntum konceptið fyrir höfðu tröllatrú á okkar hugmyndafræði. Og í gær opnuðum við með átta algerlega frábæra veitingastaði og framúrskarandi Cocktail-Bar,“ segir Leifur og bætir við að þeir séu alveg í skýjunum við viðtökunum sem þeir hafi fengið.

„Við erum afar þakklátir fyrir þær viðtökur sem við höfum þegar fengið frá þeim aðilum sem hafa heimsótt okkur síðustu daga fyrir opnun og enn þakklátari fyrir að fá að taka þátt í þessu ævintýri með öllu því frábæra fólki sem er að opna sína staði hjá okkur.“

Hér fyrir neðan má sjá brot af stemningunni frá opnuninni í gær.