Hér er á ferðinni einfalt og ferskt fiski taco með jalapenjó-avókadó sósu sem þið eigi eftir að elska. Þessi réttur kemur úr smiðju Maríu Gomez sem heldur úti bloggsíðunni Paz.is. María lofar lesendum að þessu réttur sé einfaldur í framreiðslu og taki stutta stund að útbúa. Í upphafi nýrrar viku er ávallt svo dásamlegt að fá sér ljúffenga fiskrétt og sérstaklega þegar brögðin eru spennandi og útfærslan skemmtileg.
„Ég lofa að þetta er svo einfalt að gera og tekur ekki nema stutta stund og eiginlega eina sem maður þarf að hafa eitthvað smá fyrir er að steikja fiskinn,“ segir María og bætir við að þessi réttur hafi slegið í gegn á hennar heimili.
Hér kemur uppskriftin af þessum dásamlega tacorétt sem á eftir að slá í gegn í eldhúsinu ykkar.
Fiski taco með jalapenjó- avókadó majósósu
Hrásalat í taco
90 g smátt skorið kínakál
100 g smátt skorið rauðkál
140 g smátt skornir smá tómatar
1 smátt skorið avókadó
70 g smátt skorinn rauðlaukur
2 tsk. sykur
Raspaður börkur af einu lime
4 tsk. nýkreistur limesafi
Jalapenjó-avókadó majó
1-2 stk. marin hvítlauksrif
1 dl majónes
½ stk. þroskað avókadó
25 dropar Tabasco sósa með jalapenjóbragði
Kryddhjúpur á fiskinn
1 tsk. hvítlauksduft (garlic powder, ekki hvítlaukssalt)
1 tsk. laukduft (onion powder)
1,5 tsk. fínt borðsalt (hafið það fínt salt ekki gróft)
1 tsk. cumin (ekki Kúmen eins og í kringlum)
1 tsk. sykur
1 tsk. paprikuduft
1 tsk. timian þurrkað
2 egg
1 dl hveiti eða jafnvel ögn meira
Annað sem til þarf
350 g hvítur fiskur, María notaði ýsu
1-2 pakkar mjúkar taco kökur
Sriracha sósa
1 l af grænmetisolíu eða sólblómaolíu eða canolaolíu
Aðferð
Hrásalatið
Skerið kálið í mjóar lengjur og restina af grænmetinu mjög smátt og setjið saman í eina skál. Raspið lime börkinn út á og bætið við sykrinum og limesafanum, hrærið öllu vel saman.
Jalapenjó-avókadó majó
Merjið hvítlauk út í blandara og bætið restinni af innihaldi sósunnar út í. Blandið í blandara þar til verður að silkimjúkri kekkjalausri sósu.
Kryddhjúpur á fiskinn
Blandið öllum kryddunum saman í litla skál. Brjótið næst 2 egg á djúpan disk og bætið kryddunum út í og hrærið vel saman með gaffli eða písk þar til kryddið er vel blandað saman við eggin. Setjið svo hveiti á annan disk. Þerrið fiskinn á eldhúspappír svo mesti rakinn fari úr honum og skerið hann svo í litla ferninga á stærð við stóran tening. Hitið alla olíuna á pönnu og veltið fiskinum upp úr hveiti og hristið allt umfram hveiti af. Veltið svo beint upp úr egginu og setjið út í heita olíuna þar til bitarnir verða fallega gylltir. Setjið svo bitana á disk með eldhúspappír á til að umfram olía fari af. Svo er bara að setja salat á taco köku, fiskinn ofan á og sósurnar yfir og njóta.
