Sunnudagar eru gjarnan kósýdagar fjölskyldunnar og þá er ljúft að laga góðan kvöldverð saman. Byrja daginn með huggulegri morgunstund, jafnvel fá sér bröns saman og eiga gæðastundir með sínum allra bestu um daginn og enda síðan á ljúffengum kvöldverð þar sem allir fá að njóta sín.
Berglind Hreiðars okkar ástsæli matarbloggari birti þessa dýrðlegu uppskrift á síðunni sinni Gotterí og gersemar þar sem kjúklingaleggir spila stórt hlutverk ásamt dásamlegu góðu meðlæti, kartöflu og rjómakenndum maís. Hér er á ferðinni haustleg útfærsla á meðlæti sem er tilvalin þar sem kartöfluuppskeran er komin í hús.
„Í sumar pantaði ég grillaðan kjúkling á einum af veitingastöðunum þar og fékk í fyrsta sinn „Creamy Corn“ eða rjómakennt korn/maís sem var alveg hrikalega gott. Þetta var meðlæti með kjúklingnum ásamt kartöflumús og ég er búin að ætla að prófa að leika þetta eftir síðan ég kom heim. Það hafðist loks og þetta var algjört dúndur,“ segir Berglind og er nokkuð ánægð með útkomuna.
Hægt að fá allt hráefnið í þessa rétti í Bónus.
USA kjúklingur að hætti Berglindar Hreiðars
Fyrir 4-6 manns
Grillaður kjúklingur
6 stk. kjúklingalæri með legg (keypt í Bónus)
Ólífuolía
Organic Liquid kryddlögur með hvítlauk eða hvítlaukslögur sem ykkur þykir bestur.
Kjúklingakrydd að eigin vali
Byrjið á því að hita ofninn í 210°C. Penslið ofnskúffu með ólífuolíu og raðið lærunum þar ofan í. Berið þunnt lag af ólífuolíu á hvert læri og einnig Organic Liquid hvítlaukslög (um ½ tsk. á hvora hlið). Kryddið vel með kjúklingakryddi á báðum hliðum. Eldið í 40-45 mínútur og leyfið að standa í 5-10 mínútur áður en skorið er í kjötið.
Kartöflumús
1,2 kg kartöflur (gular eða bökunar)
40 g smjör
2 msk. sykur
1 tsk. salt
200 ml nýmjólk
Sjóðið kartöflurnar í söltu vatni (2 tsk.salt). Mér finnst best að flysja þær fyrst og skera til helminga (í fernt ef þið eruð með bökunarkartöflur) því þá eru þær tilbúnar í hrærivélina um leið og þær eru mjúkar. Setjið kartöflur, smjör, sykur og salt í hrærivél og blandið á lágum hraða með K-inu. Bætið mjólkinni saman við í litlum skömmtum. Bætið við mjólk ef þið viljið þynnri mús.
Rjómakenndur maís
6 heilir ferskir maískólfar (um 650 g maískorn þegar búið er að skera af stönglunum) eða frosnir
100 g smjör
30 g hveiti
250 ml matreiðslurjómi
Salt og pipar
1 tsk. Organic Liquid kryddlögur með hvítlauk eða hvítlaukslögur sem ykkur þykir bestur
1 msk. hunang
Skafið maískornin af stönglunum og steikið við meðalháan hita upp úr smjörinu, saltið og piprið og leyfið að malla/eldast í um 5 mínútur. Hrærið hveitinu næst saman við og hellið svo rjómanum út á pönnuna, hækkið hitann í smá stund og hrærið vel allan tímann. Þegar blandan þykknar má lækka alveg niður hitann og krydda með Organic Liquid, salti og pipar eftir smekk ásamt því að hræra hunanginu saman við.
Berið fram á fallegan hátt og njótið með ykkar bestu.
