Sunnudagar eru gjarnan fjölskyldudagar þar sem fjölskyldan gerir vel við sig í mat og drykk og nýtur þess að eiga saman hugljúfar samverustundir. Hér er á ferðinni dásamleg uppskrift af hinum fullkomna sunnudagskvöldverði fyrir þá sem elska steikur með góðu meðlæti sem bragð er af. Balsamik marínerað ribeye með sætkartöflusalat af betri gerðinni er það nýjasta úr smiðju Berglindar Hreiðars köku- og matarbloggara með meiru sem heldur úti síðu Gotterí og gersemar.
Sætar kartöflur í kartöflusalati er góð tilbreyting frá þessu hefðbundna og þetta hérna var algjörlega dásamlegt. Smá spicy og þið getið auðvitað stýrt því hversu mikið chilli majónes þið setjið á móti því klassíska. Þetta kartöflusalat verðið þið að prófa. Steikin og salatið er klárlega hin fullkomna tvenna ef ykkur langar í góðan kvöldverð.
Spicy sætkartöflusalat og balsamik marínerað nautakjöt
Fyrir fjóra
Sætkartöflusalat
700 g sætar kartöflur
50 g Hellmann‘s Chilli majónes
70 g Hellmann‘s klassískt majónes
½ rauðlaukur (saxaður)
1 tsk. saxað ferskt chilli
2 rifnir hvítlauksgeirar
1 msk. sætt sinnep
Salt og pipar eftir smekk
Ólífuolía
Hitið ofninn í 200°C. Flysjið kartöflurnar og skerið í munnstóra teninga. Veltið upp úr um 3 msk. af ólífuolíu og salti og pipar eftir smekk. Bakið í um 25 mínútur eða þar til kartöflubitarnir mýkjast, kælið síðan alveg niður áður en salatið er útbúið. Pískið saman báðar tegundir af majónesi ásamt sinnepi, chilli, hvítlauk, salti og pipar. Blandið síðan saman kartöflum, rauðlauk og majónesblöndu og berið fram með steikinni.
Balsamik marínerað ribeye
3-4 sneiðar ribeye
50 g ólífuolía
50 g balsamik edik
50 g soya sósa
40 g Worcestershire sósa
1 tsk. Dijon sinnep
2 rifin hvítlauksrif
½ tsk. salt
¼ tsk. pipar
Hrærið öllu saman nema kjötinu. Hellið maríneringunni yfir kjötið í skál eða setjið í zip-lock poka svo lögurinn umlyki allar steikurnar. Plastið og marínerið í um tvær klukkustundir. Grillið síðan á vel heitu grilli þar til kjarnhiti er um 58°C og leyfið þeim að hvíla í um 10 mínútur áður en þið skerið í þær.
