Veitingastaðurinn Borg Restaurant opnar í kvöld, eftir gagngerar endurbætur þar sem tignarleikinn hefur verið hafður í forgrunni. Af því tilefni var haldið opnunarhóf í gærkvöldi og fjölmargir góðir gestir komu og fögnuðu endurvakningu Borgarinnar. Það var óneitanlega mikil stemning í loftinu og Borgin iðaði af lífi á ný. Boðið var upp glæsilegar veitingar, úr smiðju Hákonar Más Örvarssonar matreiðslumeistara sem er yfirkokkurinn í eldhúsinu og á heiðurinn af matseðlinum.

Búið er taka allt í gegn innandyra og endurheimta hinn klassíska og glæsilega stíl hússins, sem Jóhannes Jósefsson, byggði árið 1930. Það má með sanni segja að Borgin sé búin að endurheimta glæsileikann og  þann anda sem hún á skilið og klæðir hana best. Maturinn er í sama stíl, klassískur, glæsilegur og einstaklega ljúffengur. Fyrir marga er það hrein nostalgía að koma að njóta þess sem staðurinn hefur upp á að bjóða og er metnaðurinn í hávegum hafður hvort sem það er umgjörðin, matargerðina, þjónustuna eða upplifunina sem boðið er upp á.

Einvalalið hefur staðið vaktina á Borginni en til að tryggja gestum góða upplifun hafa hjónin Jóhann Gunnar Arnarsson og Kristín Ólafsdóttir komið að breytingunum og tekið þátt í útfærslu á þeirra upplifunar sem gestir staðarins munu njóta. Einnig er dóttir þeirra, Katrín Ósk, rekstrarstjóri veitingastaðarins, en hún er lærður framreiðslumeistari með margra ára reynslu í faginu, fyrir utan það að hafa lært öll trix foreldra sinna

Nú um helgina verður opið frá klukkan 18.00 og frá og með mánudeginum verður einnig opið í hádeginu. Nýtt gullaldarskeið er hafið á Borginni og mun án efa efla matar- og menningarlífið í hjarta miðborgarinnar.

Sjáið myndir úr opnunarhófinu: