Erum við ekki öll með girnilega ávaxtaskál í eldhúsinu? Sem á að lokka fjölskyldumeðlimi til að fá sér hollan ávöxt í amstri dags? Og svo er fátt fallegra en að sjá þessa náttúrulegu litafegurð taka á móti okkur þegar við göngum inn í eldhúsið.
En mikið ferlega er það svo svekkjandi þegar eitt epli rotnar og skyndilega er allt í skálinni orðið myglað og ónothæft! Farðu yfir listann og gáðu hvort þú sért að velja rétta ávexti til að hafa í skálinni… Margt á helst að vera í ísskápnum.
Banana á alltaf að geyma við stofuhita. Í ísskápnum helst kjötið hart en verður samt sem áður brúnt og miður geðslegt.
Margir freistast til að geyma sítrónur, appelsínur og límónur í ávaxtaskálinni. Frísklegir litirnir eru svo fínir í skálinni með hinum ávöxtunum. En sítrusávexti á að geyma í ísskáp því þeir þola ekki geymslu við stofuhita nema í örfáa daga áður en þeir byrja að mygla. Myglan smitar líka út frá sér í aðra ávexti í skálinni.
Óþroskaðan (harðan) avókadó ættir þú að geyma við stofuhita. Í ísskáp stöðvast þroskinn og græna kjötið fær brúna bletti. Mjúkt og passlega þroskað avókadó geymist hins vegar best í ísskápnum þar til á að nota í mat.
Mangó á aldrei að geyma í ísskáp því það verður bragðlaust og hættir að þroskast. Láttu ávöxtinn frekar liggja frammi við stofuhita. Ef þú vilt flýta fyrir þroskanum má pakka mangóinu inn í dagblað og láta vera við stofuhita dagsstund.
Melónur í heilu lagi á að geyma við stofuhita, en skornar í ísskáp.
Perur þroskast mjög hratt í stofuhita en ef þú geymir þær í ísskápnum hægist rækilega á þroskanum. Ef þú hins vegar veist af því að þú ætlar að njóta perunnar að kvöldi til, skaltu endilega taka hana út úr ísskápnum að morgni, því þá nær hún að verða akkúrat passlega mjúk og safarík.
Epli eiga helst að fá að vera þar sem er svalt. Í ísskáp, köldu búri eða jafnvel í bílskúrnum. Epli gefa frá sér svokölluð etyl sem getur aukið á þroska hjá öðrum ávöxtum og grænmeti svo best er að láta þau liggja í poka eða útaf fyrir sig.
Geymdu kíví frekar í poka inni í ísskápnum en frammi á borði. Kívi skemmist frekar hratt við stofuhita.
Jarðarberin skemmast því miður frekar hratt hvort sem þau eru geymd við stofuhita eða í ísskáp. Ekki skola þau eða taka græna stilkinn af fyrr en rétt áður en þú ætlar að borða þau. Skoluð og stilkalaus byrja þau enn fyrr að mygla.
Íslensk jarðarber geymast að sjálfsögðu langbest… og bragðast best!
