Þorgeir Jón Gunnarsson deildi rosalegu ráði í Facebook-hópinn Matartips. Færsla hans hefur fengið gríðarleg viðbrögð. En rúmur klukkutími er síðan hann deildi færslunni og hafa þegar yfir 270 manns líkað við hana.

„Matartips dagsins: dýfa gifflum í súkkulaði. Getið þakkað mér seinna,“ skrifar hann og vísar í Gifflar snúðana frá Pågen sem fást í flestum matvöruverslunum.

DV hafði samband við Þorgeir Jón til að forvitnast hvaðan þessi hugmynd kom.

„Ég elska súkkulaði og hef vitað að fólk er að setja nutella á snúða. Ég var að súkkulaðihúða jarðaber og sonur minn að borða giffla svo ég stakk einum í og það var líka svona ljómandi,“ segir Þorgeir.

„En annars þá eru einhverjar svona giffla uppskriftir á heimasíðunni þeirra en það er ekki eins góð saga.“

Þorgeir segir að það sé einnig hægt að dýfa snúðunum í alls konar súkkulaði, eins og daim eða með lakkrís.

Vakti athygli

Eins og fyrr segir hefur færslan vakið mikla athygli og hefur fjöldi fólks skrifað við hana.

„Ó þú veist ekki hvað þú varst að gera,“ skrifaði einn netverji.

„Ohh eins og þeir hafi ekki verið ávanabindandi fyrir,“ skrifaði annar.

„Mér fannst ég vera alveg nógu feitur fyrir,“ sagði einn hópmeðlimur

„Þetta er besta hugmynd sem ég hef séð lengi!“ sagði annar.

Einn kom með aðra góða hugmynd fyrir snúðana. „Ég set allan pokann í örbylgju þangað til pokinn springur, eða um 40 sek og borða það svo rjúkandi heitt með ískaldri mjólk.“

Annar sagði: „Geggjað að setja í öbbann og smyrja með nutella.“