„Ég byrjaði að þyngjast í kringum 11 eða 12 ára aldurinn. Ég var lögð í einelti sem varð til þess að ég gróf tilfinningar mínar dýpra með mat,“ segir Emily Shiffer, oft kölluð Lele. Hún segir söguna af sinni reynslu af ketó-mataræðinu á vef Women‘s Health.
Emily segist hafa hafa prófað nánast hvaða kúra sem er til að léttast, en árið 2006 var hún greind með áunna sykursýki. Þá setti læknirinn hennar hana á mataræði sem fólst í því að borða minni fitu og meira af ávöxtum og grænmeti.
https://www.instagram.com/p/BsOQLLEAxPt/
„Ég léttist um 27 kíló en síðan bætti ég því öllu á mig aftur,“ segir Emily. Hún eignaðist son árið 2012 og segir hann hafa hvatt sig til að losa sig við aukakílóin og koma sér í heilbrigðara form.
„Fyrstu tvö eða þrjú ár lífs hans var ég enn að grafa tilfinningar mínar með mat – streitan sem fylgdi því að vera mamma, vera í nýrri vinnu og borga reikninga var nóg fyrir mig til að oféta,“ segir hún og bætir við að hún hafi fengið nóg stuttu fyrir þriggja ára afmæli sonarins.
„Mér fannst ég vera að drepa sjálfa mig og mig langaði að vera heilbrigð fyrir son minn.“
Emily fann ketó-mataræðið árið 2015 og ákvað að prófa.
„Það var mjög erfitt fyrst, sérstaklega út af því að ég hafði verið að borða litla fitu. Maður veit í raun ekki hve mikla fitu maður þarf á ketó-mataræðinu fyrr en maður prófar það. Það er erfitt í fyrstu. Árið 2015 voru heldur ekki til jafn margar ketó-lausnir og eru til í dag. Auk þess var læknirinn minn ekki hrifinn af því að ég prófaði ketó-mataræðið, en samþykkt samt að fylgjast með ferlinu mínu,“ segir hún.
https://www.instagram.com/p/BqNaR04hpGi/
Eftir aðeins sex mánuði á mataræðinu gat hún sleppt því að fá insúlín í æð og er ekki á neinum lyfjum í dag til að hafa stjórn á sykursýkinni. Emily segist reyna að borða mikið af hollri fitu, eins og lax, lárperur og hnetur, en leyfir sér einnig ketóvæn sætindi. Hún fær sér til dæmis iðulega súkkulaðiköku í eftirrétt á kvöldin.
Á þessum þremur árum hefur Emily misst tæp 45 kíló og hreyfir sig reglulega. Hún segist vilja léttast um tæp þrjátíu kíló í viðbót og telur að hún nái því markmiði á þessu ári. Hún segir mikilvægt að fólk hafi góðar ástæður fyrir því að breyta um lífsstíl.
„Það er mikilvægt að minna sig á af hverju maður ákveður að léttast. Ég vildi verða heilbrigð og orkumikil fyrir sex ára orkubúntið mitt – mig langar að vera til staðar fyrir hann eins lengi og ég get,“ segir hún, en hér fyrir neðan er uppskrift að súkkulaðikökunni sem Emily elskar.
https://www.instagram.com/p/Br8Q4qoB9pM/
Kaka – Hráefni:
1½ bolli sýrður rjómi
1 bolli möndlumjöl
¾ bolli Monkfruit sætuefni
¾ bolli kakó
115 g smjör, mjúkt
1½ tsk. lyftiduft
1–2 msk. vanilludropar
2 egg við stofuhita
2 msk. instant kaffi
½ tsk. salt
Krem – Hráefni:
225 g rjómaostur, mjúkur
1½ bolli Monkfruit sætuefni
2 msk. rjómi
Aðferð:
Hitið ofninn í 175°C. Blandið smjöri, vanilludropum og sætuefni vel saman þar til blandan er silkimjúk. Blandið eggjunum saman við, einu í einu. Bætið sýrða rjómanum út í og hrærið þar til blandan er kekkjalaus. Blandið möndlumjöli, kakói, instant kaffi, salti og lyftidufti saman í annarri skál. Bætið þurrefnunum varlega saman við smjörblönduna. Hellið blöndunni í smurt form, sem er sirka tuttugu sentímetra stórt, og bakið í 25 til 35 mínútur. Leyfið kökunni að kólna alveg áður en kremið er sett á. Blandið öllum hráefnum í kremið vel saman þar til blandan er kekkjalaust. Skreytið kökuna og njótið.
