Á milli jóla og nýárs reyni ég alltaf að brydda upp á einhverjum fiskréttum og nú varð plokkfiskur fyrir valinu, enda mikill huggumatur. Þar sem ég er að ná mér eftir smávægileg veikindi þótti þetta tilvalið.
Hráefni:
600 gr soðinn þorskur/ýsa
300 gr soðin blómkálsblóm
2–3 msk. smjör, brætt
150 gr rjómaostur
3–4 dl rjómi, eftir því hversu mikla sósu þú vilt hafa á plokkaranum
¼ tsk. xanthan gum (þetta er mikið notað í ketó rétti til að þykkja sósur ofl)
1 tsk. salt (ég nota alltaf Pink Himalayan salt sem er mjög ketó vænt)
½ tsk. svartur pipar
¼ tsk. múskat
½-1 msk. sæta
svo má líka poppa hann upp með karrý eða t.d. dijon sinnepi, allt eftir smekk
cheddar ostur, rifinn
parmesan ostur, rifinn
vorlaukur, saxaður
Aðferð:
Ofninn hitaður í 200°C. Smjör og rjómaostur bræddur í potti yfir meðalhita og rjómanum bætt út í. Látið malla aðeins og xanthan gum bætt við til að þykkja sósuna. Fiskinum fyrst bætt í sósuna, svo blómkálinu og svo ef til vill eins og hálfum lauk. Ég hef hann alltaf til hliðar svo getur fólk ráðið hversu mikinn lauk það vill í skálina með plokkfisknum. Rétturinn kryddaður, sætu bætt við og hellt í eldfast mót. Yfir þetta ríf ég cheddar ost og parmesan og krydda smá yfir ostinn með múskati eða papriku. Bakað í tuttugu mínútur og fullt af vorlauk stráð yfir áður en borið er fram.
Plokkfiskur er í miklu uppáhaldi hjá mér og þegar ég varð ketó fór ég strax að sjá eftir honum og fleira góðgæti sem ég hélt að ég yrði að kveðja. En, nei! Þessi útgáfa af plokkara lyftir honum á æðra plan. Silkimjúkur í sparifötum kalla ég hann. Njótið! Endilega fylgið mér á Instagram þar sem ég verð mjög virk á næsta ári.
