Systurnar Ragnheiður og Elísabet Stefánsdætur halda úti Facebook-síðunni og Snacphat-reikningnum Matarlyst þar sem þær deila uppskriftum. Þær hafa vakið mikla athygli síðustu misseri, en matarvefurinn fékk leyfi til að birta uppskrift þeirra að jólaís sem lofar mjög góðu.

„Þessa dásamlegu og silkimjúku uppskrift að lakkrísís með opal skoti settum við saman um daginn. Við erum búnar að gera hann nokkrum sinnum og búnar að fá ótal munna til að smakka. Það sem heyrist er: Mmmmm,“ segja systurnar.

„Klárlega jólaísinn í ár.“

Dásamlegur lakkrís ís með opal skoti og fylltum lakkrísreimum

Hráefni:

6 eggjarauður
200 g sykur
70 ml Opal skot með pipar (þessi brúni)
1/2 l rjómi, léttþeyttur
200 g fylltar lakkrísreimar skornar smátt niður

Aðferð:

Léttþeytið rjómann, leggið til hliðar. Eggjarauður og sykur þeytt þar til létt og ljóst, bætið út í Opal skoti. Látið vélina ganga á lægsta hraða þar til komið er vel saman í sirka hálfa til eina mínútur. Blandið rjómanum varlega út í eggjablönduna með sleikju í smáum skömmtum. Í lokin bætið þið fylltum, smátt skornum lakkrísreimum út í og blandið varlega saman. Setjið í skál eða annað ílát. Frystið.