Fjölmiðlamaðurinn Jakob Bjarnar Grétarsson er mikill matgæðingur, en hefur einnig unun að veiðimennsku. Í sumar skaut hann hreindýrstarf með góðvini sínum, rithöfundinum og leikskáldinu Mikaeli Torfasyni, og notar kjötið til að mynda til að búa til hreindýraborgara.
Jakob segir hreindýraborgarana vera orðna þekkta innan fjölskyldunnar, en uppskriftin hefur verið lengi í þróun. Við gefum Jakobi orðið með þessari margfrægu uppskrift að hreindýraborgurum.
Hráefni:
1 kg hreindýrahakk
1/2 laukur
1/2 chili pipar
salathaus
2 tómatar
4 beikonsneiðar, þykkar
1 askja sveppir
ostur
1 bolli þurrkaðir lerkisveppir
1 egg
4 hamborgarabrauð xl
villikraftur
pipar
salt
smjör
hveiti
tilbúna (hamborgara)sósu að eigin vali
Aðalmálið er náttúrlega hráefni. Og tarfurinn sem við Mikael skutum í sumar, 116 kg, er ekki að svíkja. Þú tekur 1 kg hreindýrahakk og setur í góða skál. Síðan skerðu niður lítinn lauk, mjðg smátt saxaðan og setur útí. Þá hálfur chili pipar, mjög smátt saxaður einnig. Kryddar með salti, pipar, villikrafti og smellir einu eggi útí líka.
Þetta hrærir þú vel saman með góðri sleif. Hitar vatn og setur þurrkaða lerkisveppina sem þú týndir uppá Jökuldal í skál og sjóðandi vatn yfir. Leyfir þessu að jafna sig í tíu mín, færð þér sígó, tékkar á Facebook og athugar hvort þú getir hent einhverjum sprengjum inní umræðuna.
Svo er bara allt á milljón. Stór panna á eldavélina og góðan hita undir. Skerð beikonið í þægilega bita, og á pönnuna. Rífur sveppina niður á pönnuna og smellir góðri klípu af smjöri með. Hellir vatninu af lerkisveppunum og leyfir þeim að vera með í partíinu.
Þá er að snúa sér að hakkinu. Setur góða lúku af hveiti á bretti. Hveiti á hendurnar á þér og svo er bara að vaða í skálina og hnoða góða bolta. Ég er ekki að tala um einhverja aumingja, þetta eru góðir 250 gramma boltar sem þú þéttir svo út á brettinu. Þetta eru vææænir borgarar. Við erum ekki að standa í þessu öðruvísi. Sem er jafnframt mjög mikilvægt því við viljum að villibráðarbragðið sé í aðalhlutverki.
Nú ætti sveppabeikonmaukið að vera orðið ágætt, ýtir því til hliðar, á pönnuna með borgarana og meðan þeir eru að steikjast skerðu niður salat og tómata. Flippar borgurunum og setur ostasneiðar á. Ef þú ert að gera marga í einu getur verið gott að setja brauðið í ofn, annars, ef maður er með einn eða tvo í gangi í einu er hægt að setja brauðið á pönnuna. Mér finnst það betra, því brauðið tekur þá í sig smjör og feiti frá beikoninu og borgurunum.
Svo er bara að færa brauðið á disk. Setur einhverja slettu af tilbúinni sósu að smekk þar við, maukið á brauðið; tómata og salat. Og svo borgarann á og bara vaða í þetta. Voila, bon appetit!
Já, þetta er alvöru, ég veit, en það var ekki um neitt annað talað. Mér finnst best að hafa ískalda kók í lítilli dós með þessu en alvöru fólk splæsir auðvitað í eina rauða. Ég mæli með Marques de Riscal, eða fæst það ekki örugglega enn í ÁTVR?
