Glóey er ein sögufrægasta rafmagnsvöruverslun á landinu og eftir um 47 ára starfsemi verður versluninni lokað á föstudaginn 28. febrúar fyrir fullt og allt.
Glóey hefur ávallt verið fjölskyldurekið fyrirtæki og sérhæft sig í öllu því sem viðkemur rafmagni. „Við höfum ætíð kappkostað að vera með fyrsta flokks vörur á góðu verði. Í gegnum tíðina höfum við verið í sterku sambandi við viðskiptavini okkar og ef í ljós kom að einhver vara virkaði ekki sem skyldi, þá tókum við þá vöru strax úr sölu og fundum aðrar og betri vörur,“ segir Baldur Hannesson, einn eigandi Glóeyjar.
Sátt en söknuður
„Að sjálfsögðu er söknuður í okkur, en við erum afar sátt við okkar starf, enda höfum við kynnst frábæru fólki sem hingað hefur komið reglulega í áraraðir. Staðreyndin er bara sú að salan hefur minnkað hjá okkur undanfarin ár og því er kominn tími til að hætta.“
Glóey var lengi vel eina sérvöruverslunin á Íslandi sem seldi jólaljós. „Desember var þá langstærsti mánuðurinn og hér störfuðu um 8-12 starfsmenn og alltaf fullt út úr dyrum af fólki sem vildi lýsa upp skammdegið með jólaljósum.“
Á föstudaginn 28. febrúar hættir verslunin eftir hálfrar aldar starfsemi. „Til þess að losa um lagerinn gefum við mikinn afslátt af öllu í búðinni. Þá erum við með ýmiss konar lampa, ljós, raflagnaefni, ljósaperur af ýmsu tagi, tausnúrur, ljósaseríur, dimmera, tímarofa, dyrabjöllur, borðviftur, heimilistæki og margt fleira á 10-70% afslætti! Margt af þessu erum við að selja undir kaupverði af heildsala.“ Því er ljóst að hægt er að gera frábær kaup á rafmagnsvörum hjá Glóeyju í vikunni.
Þetta fæst ekki hvar sem er
„Það er búið að vera mikið um að vera síðustu daga og næstum eins og desember hér á árum áður. Fólk er ýmist að nýta sér afsláttinn, en einnig er það að koma til þess að ná sér í varabirgðir. Það veit að þessar vörur fást hvergi annars staðar. Samkeppnisaðilar hafa meira að segja verið að benda fólki að koma til okkar. Fyrir nokkrum árum byrjuðum við t.d. að flytja inn litaðar tau-rafmagnssnúrur í nokkrum litum. Nú eigum við snúrur í öllum regnbogans litum. Einnig eigum við með yfir 40 tegundur af fattningum eða perustæðum. Hér er því alger ævintýraheimur fyrir þá sem eru að gera eigin ljós og lampa.“
Það er ennþá fullt til af allskonar lömpum, inni- og útiljósum, perum og ýmiss konar sérvöru. Komdu við í Ármúla 19, 108 Rvk. og gerðu frábær kaup áður en verslunin lokar á föstudaginn.
