„Hlífðarpúðarnir eru aðallega hugsaðir til að verja íþróttamenn fyrir höggum en þetta fer eftir íþróttum. Fólk fær frekar högg á sig í handbolta heldur en til dæmis í körfubolta og þegar fólk dettur á gólfið og á í hættu að lenda á mjaðmakúlu eða á olnbogann. Það getur skapað langvarandi vanda og frí frá æfingum ef höggið er slæmt. Þessar vörur eiga að minnka slíkan skaða,“ segir Helgi Jónas Guðfinnsson, fyrrverandi atvinnu- og landsliðsmaður í körfubolta, sem fyrr á þessu ári stofnaði fyrirtækið Sporthlífar.
„Við erum með hlífðarbuxur, hnéhlífar og olnbogahlífar fyrir handboltamenn og körfuboltaspilara og fyrir fótboltamenn erum við með legghlífar sem aðlagast sköflungnum. Í rauninni erum við með vörur fyrir fólk í svokölluðum snertiíþróttum þar sem mikið er um pústra og höfum við fengum mjög góða endurgjöf frá fólki sem hefur notað þessar vörur.“
Fyrirtækið sem framleiðir vörurnar, GamePatch, er lettneskt og segir Helgi að tæknin sem notuð sé við framleiðsluna sé einstök. „Hlífðarpúðarnir aðlagast að líkamanum þegar viðkomandi hitnar og finnur hann ekki fyrir þeim.“ Allar vörurnar eru í samræmi við ströngustu gæðastaðla með endingargóðum saumum og úr þægilegu efni og er GamePatch með einkaleyfi á fyrrnefndri tækni.
Sporthlífar er með netverslun og segir Helgi að markmiðið sé að selja vörurnar einnig í vel völdum verslunum í framtíðinni. „Þetta er svo nýtt að við erum að reyna að koma þessu inn á markaðinn.“
Upphafið að fyrirtækinu má rekja til þess að sonur Helga, Aron Tristan, datt og meiddi sig í körfuboltaleik og var frá í einhvern tíma. Helgi leitaði á netinu að hlífum til að hann gæti notað og fann hann heimasíðu GamePatch og ákvað hann, ásamt eiginkonu og vinum, að gerast dreifingaraðili fyrir vörurnar á Íslandi. „Þegar sonur minn sagði að þetta væri geggjað fengum við landsliðsmenn í körfubolta og handbolta til að prófa þessar vörur og sjá hvernig þeir myndu fíla þær og þeir gáfu okkur mög gott „feedback“ á þetta,“ segir Helgi.
