Í fjörukambinum við Hellnar á Snæfellsnesi má finna Fjöruhúsið, heimilislegt og vinalegt kaffihús, sem laðar til sín gesti sem vilja njóta veitinga í náttúrufegurð Snæfellsnes. Sérstaða kaffihússins felst í nálægðinni við náttúruna, en það hvílir alveg við fjöruna, sést ekki frá þjóðveginum og þar er ekki spiluð tónlist til að gestir geti hlustað á náttúruna.

„Þetta var svona einhver hugdetta,“ segir Sigríður aðspurð um af hverju hún opnaði kaffihúsið á sínum tíma. Hún hafði enga reynslu af kaffihúsarekstri, en vel hefur gengið og gestastraumur góður frá opnunartíma um páskana ár hvert þar til lokað er fyrir veturinn í október, nóvember, eftir því hvenær fólk hættir að koma að sögn Sigríðar.

Húsið sem kaffihúsið er í var reist í kringum 1930 og notað sem veiðarfærageymsla, þar til árið 1997 þegar Sigríði og eiginmanni hennar, Kristjáni Gunnlaugssyni, datt í hug að sniðugt væri að opna kaffihús í þessari gömlu veiðarfærageymslu. Fjöruhúsið fagnar því 21 árs afmæli nú í ár.

Á boðstólum er meðal annars aðall hússins, fiskisúpan, sem Sigríður matreiðir af snilld, auk þess sem léttir réttir, kökur og vöfflur eru í boði.

Opið er alla jafna frá kl. 11 á morgnana til kl. 21 á kvöldin, en opnunartíminn er ekki niðurnegldur.

Fjöruhúsið er að Hellnum, Snæfellsbæ, síminn er 435-6844 og netfangið er fjoruhusid@isl.is.